Meksika Birləşmiş Ştatlarının Azərbaycandakı fövqəladə və səlahiyyətli səfiri Mariya Viktoriya Romero Kabalyero səfirliyin əməkdaşları – mədəniyyət işləri üzrə müşaviri Aristeo Gonzalez Guerrero və mətbuat xidmətinin nümayəndəsi Günel Hacıyeva ilə birlikdə Nizami Muzeyində olublar.

Əvvəlcə səfir Mariya Viktoriya Romero Milli Azərbaycan Ədəbiyyatı Muzeyinin direktoru akademik Rafael Hüseynovla görüşüb.

Görüş zamanı səfir ölkəsi ilə Azərbaycan arasındakı əlaqələrin bütün istiqamətlər üzrə inkişafında maraqlı olduğunu, yeni irəliləyişlərin əldə edilməsi üçün bütün zəruri tədbirləri görməyə çalışdığını, həmçinin mədəniyyət sahəsinə xüsusi önəm verdiyini bildirib.

Akademik Rafael Hüseynov qeyd edib ki, Meksika Azərbaycan üçün xüsusi əhəmiyyət kəsb edən dost ölkələrdəndir və bunun bir çox səbəbləri var. Onun sözlərinə görə, Meksika 1991-ci ilin dekabrında Azərbaycanın müstəqilliyini tanıyan ilk ölkələrdən olub, 1992-ci ildən isə Azərbaycanla Meksika arasında diplomatik münasibətlər qurulub: "Lakin Azərbaycan xalqı, dövləti üçün xüsusi əhəmiyyət kəsb edən daha bir həssas məsələsə ondan ibarətdir ki, dünyanın bir sıra dövlətləri və parlamentləri arasında Meksika Senatı ermənilərin 1992-ci ilin fevralında Xocalıda törətdikləri soyqrımı tanıyan ilklərdən oldu və bu gün də Meksikada Xocalı soyqırımına həsr edilmiş kompleks ucalmaqdadır".

Direktor bildirib ki, Azərbaycan həmişə Meksikanın ədəbiyyatına, mədəniyyətinə və incəsənətinə böyük maraq göstərib. Vaxtilə meksikalı rəssam Xose David Sikeyros Azərbaycanda olub, onun mədəniyyətimizlə əlaqələri haqqında araşdırılmalar aparılıb.

Ədəbiyyat Muzeyinin gələcəkdə Meksika ilə geniş əməkdaşlıq aparmağa və bir sıra müştərək layihələri gerçəkləşdirməyə hazır olduğunu söyləyən akademik Rafael Hüseynov Azərbaycandakı Meksika səfirliyinin vasitəçiliyi ilə “Vətən və azadlıq haqqında şeirlər” adlı toplunun tərtib edilməsi təklifini irəli sürüb. Qeyd edib ki, Meksika şairlərinin bu mövzuda şeirlərinin Azərbaycan dilinə bədii tərcüməsi Nizami Muzeyi, Azərbaycanın müxtəlif dövrlərdə yaşayıb yaratmış şairlərinin ispancaya çevirmələri isə Bakıdakı Meksika səfirliyinin vasitəçiliyi ilə gerçəkləşəcək.

Akademik Rafael Hüseynov bildirib ki, qarşıdan Azərbaycandakı Meksika səfirliyinin özünəməxsus yubiley tarixi gəlir. Azərbaycandakı Meksika səfirliyi Meksikadakı Azərbaycan səfirliyindən bir qədər gec yaransa da mövcud olduğu on il müddətində uğurlu fəaliyyət göstərib. 2014-cü ilin oktyabr ayında yaranmış səfirliyin gördüyü işlər çoxdur və bugünkü görüşümüzdən sonra həmin işlərin daha geniş sahələri əhatə edəcəyinə inam yaranır.

Səfir Mariya Viktoriya Romero yaxın gələcəkdə Meksikanın aparıcı muzeyləri ilə Nizami Muzeyi arasında daimi əlaqələrin qurulması və əməkdaşlıq müqaviləsinin bağlanması üçün müəyyən araşdırmalar aparacağını deyib.

Sonra akademik Rafael Hüseynov qonaqlara ispan və ingilis dillərində çapdan çıxmış, müəllifi olduğu “Məhsəti Gəncəvi. Portret-oçerk” və “Şirvan şairləri” və “Söz məbədi” kitablarını hədiyyə edib.

Daha sonra qonaqlar Azərbaycan ədəbiyyatını və mədəniyyətini əks etdirən ekspozisiya ilə tanış olublar.        

Sonda səfir Mariya Viktoriya Romero muzeyin “Rəy kitab”ına ürək sözlərini yazaraq, ona Azərbaycan ədəbiyyatının mühüm mərhələlərini öyrənmək imkanı verildiyi və bu zəngin mədəniyyətin belə qayğıkeşliklə qorunduğu üçün minnətdarlığını bildirib.  

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.