İyulun 15-də Mədəniyyət kanalında “Vətənim” verlişinin görkəmli alim, böyük elm təşkilatçısı, ictimai xadim, akademik Musa Əliyevə həsr olunan üçüncü buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə bildirilib ki, ömrünün sonunadək yazıb yaratmaqdan doymayan Musa Əliyev dəyərlərə sonsuz ehtiram bəsləyib və bunu başqalarına da aşılayıb. Şöhrətli alim, zabitəli idarə rəhbəri Musa Əliyev möhkəm yaddaşa sahib olub. 

Diqqətə çatdırılıb ki, alimin ömür-gün yoldaşı Sona xanım onu əqidəcə, ruhca həmişə anlayıb, Musa Əliyevə mənəvi dəstək olub. Qızı, şərqşünas alim Rəna Əliyeva isə akademik Musa Əliyevin ömrünün son illərində qələmə aldığı xatirələrini qoruyub saxlayıb və həmin xatirələrdən ibarət kitab “Ömrüm” adı ilə çap edilib. Kitaba ADA Universitetinin rektoru professor Hafiz Paşayev müqəddimə, Rəna Əliyeva isə "Ön söz" yazıb.

Akademik Rafael Hüseynov qeyd edib ki, görkəmli alim şərəfli ömür yaşayıb, böyük irs qoyub gedib. Böyük elmi məktəb yaratmış akademik Musa Əliyev 200-dək dissertasiya işinə elmi rəhbərlik edib. Musa Əliyev elə bir ömür yaşayıb ki, övladları, nəslinin davamçıları, onu tanıyanlar həmişə bu insanla fəxr ediblər.

Verilişdə tarixçi alim, professor Dilarə Seyidzadə akademik Musa Əliyevlə bağlı xatirələrini bölüşüb. 1961-ci ildə Tarix İnstitutunda fəaliyyətə başladığını deyən Dilarə Seyidzadə AMEA-da alimin rəhbəriyi altında həyata keçirilən işlərdən danışıb. O, akademik Musa Əliyevi yalnız qüdrətli dövlət adamı, istedadlı alim kimi deyil, təvazökar insan kimi xarakterizə edib.

Musa Əliyevin nəvəsi Cəmilə Paşayeva-Seyidzadə Parisdə UNESCO-da babasının yubileyinin təntənə ilə keçirildiyini xatırladıb, onun ömür yolu ilə qürur duyduqlarını deyib. Bildirib ki, akademik Musa Əliyev həssas və kövrək, mehriban bir insan olub.

Üçüncü buraxılışda ADA Universitetinin rektoru professor Hafiz Paşayev akademik Musa Əliyevin ömrünün son illərində qələmə aldığı “Ömrüm” adlı xatirələr kitabının alimin həmişəyaşar irsini bir daha xalqımıza qaytardığını söyləyib. Qeyd edib ki, Musa Əliyev ömrü boyunca insanlara xidmət və yardım etməkdən boyun qaçırmayıb. Bu əfsanəvi elm adamı sözün əsil mənasında böyük alim, söz sahibi və nüfuzlu şəxsiyyət idi. O, təhsillə elmin vəhdətinə böyük önəm verib. 

Akademik Musa Əliyevin Moskva illərindən danışan professor Hafiz Paşayev alimin dil məsələsinə xüsusi əhəmiyyət verdiyini bildirib. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.