Binəqədi rayon Mərkəzləşdirilmiş Kitabxana Sisteminin (MKS) Mərkəzi Kitabxanasında “1 Avqust - Azərbaycan Əlifbası və Azərbaycan Dili Günü” ilə bağlı tədbir keçirilib.

Tədbirdə “Ana dilimiz” başlıqlı video-çarx təqdim olunub. Tədbiri İnformasiya-resurs şöbəsinin müdiri Şəfiqə Ağayeva giriş sözü ilə açaraq qeyd edib ki, milli varlığımız, milli-mənəvi dəyərimiz ana dilidir. Ölkəmiz üçün əlamətdar olan bu tarixi gün Ümummilli Lider Heydər Əliyevin  2001-ci il 9 avqust tarixli Fərmanına əsasən təsis edilib. Bu fərmana əsasən ölkəmizdə latın qrafikalı Azərbaycan əlifbasına keçid təmin edilib.  

Tədbirdə Nizami Gəncəvi adına Milli Azərbaycan Ədəbiyyatı Muzeyini filologiya üzrə fəlsəfə doktoru Təbəssüm Muxtarova təmsil edib. O, müasir dövrümüzdə dilimizin lüğət tərkibinə yeni daxil olan sözlər, dil tərkibimiz, dilimizin müasir problemləri mövzusunda çıxış edib.

Sonra kitabxananın Uşaq şöbəsinin müdiri Səidə Sərdarova Xalq şairi Bəxtiyar Vahabzadənin “Ana dilim” şeirini, Oxuculara xidmət şöbəsinin biblioqrafı İsmət Hüseynova isə Şirinxanım Kərimbəylinin “Ana dilim” şeirini bədii qiraətlə təqdim ediblər.

Tədbir filologiya üzrə fəlsəfə doktoru Könül Nəhmətovanın “1 Avqust - Azərbaycan Əlifbası və Azərbaycan Dili Günü”nün tarixi ilə bağlı çıxışı və Uşaq şöbəsinin baş kitabxanaçısı Aygün Əliyevanın bu mövzu əsasında  təşkil olunmuş sərgidə yer alan ədəbiyyatların biblioqrafik icmalının  təqdimatı ilə davam edib.

Sonda Könül Nəhmətova (Könül Aydın) müəllifi olduğu “Esse: yazı tiplərinə görə növləri” adlı kitabını və müəllifi Adil Aydın Nəhmət olan “Doğruların kitabı”nı Mərkəzi Kitabxanaya təqdim edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.