Bu günlərdə Nizami Gəncəvi adına Milli Azərbaycan Ədəbiyyatı Muzeyinin maraqlı ziyarətçiləri arasında görkəmli aktyor və rejissor Hüseyn Ərəblinskinin bacısı Dürsədəfin nəticəsi Raid Qafarlı muzeyi ziyarət edib. Onu bu məkana cəlb edən səbəblərdən biri davamçısı olduğu nəslin parlaq nümayəndəsi Hüseyn Ərəblinski haqqında fotoların, bəzi məlumatların Nizami Muzeyinin ekspozisiyasında yer alması, eləcə də Azərbaycan ədəbi-mədəni mühitini yaxından izləmək olub.

Hüseyn Məmməd oğlu Xələfov (Hüseyn Ərəblinski) Azərbaycan dramaturgiyasının təbliğatçısı, ilk peşəkar aktyor məktəbinin yaradıcısı olub. O,  Məhəmməd Füzulinin qələmə aldığı  “Leyli və Məcnun” poemasının motivləri əsasında Üzeyir Hacıbəyov tərəfindən 1907-ci ildə bəstələnmiş Şərqin ilk operasının rejissoru olub. Hüseyn Ərəblinskinin böyük xidmətlərindən biri də rus dili və ədəbiyyatını mükəmməl bildiyi üçün Azərbaycan səhnəsinə rus və Qərbi Avropa dramaturgiyasını gətirməsidir.

Azərbaycan səhnəsində Mirzə Fətəli Axunzadə, Nəcəf bəy Vəzirov, Əbdürrəhim bəy Haqverdiyev və digər dramaturqların əsərlərinin həm rejissoru, həm də səhnə obrazları  ilə yadda qalan Hüseyn Ərəblinski fəaliyyəti Nizami Muzeyinin ekspozisiyasında təbliğ olunur.

Boyük aktyorun nəslinin yadigarı olan 17 yaşlı Raid Qafarlı isə Bakı Fransız liseyində təhsil alıb.  Fransız, italyan, ərəb və fars dillərini bilən ziyarətçimiz,  hazırda təhsilini Azərbaycan-Britaniya Kollecində (Azerbaijani British College) davam etdirməyi düşünür. Komparativistika və bədii tərcümə şöbəsinin elmi işçisi Zarema İbrahimovanın təqdimatında Nizami Muzeyinin ekspozisiyasında  ulu babası ilə bağlı nümunələrlə tanışlıq və onun fəaliyyəti ilə bağlı məlumatlar Raid Qafarlıya bir daha fəxarət hissi yaşadıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.