Səbail rayon Mərkəzləşdirilmiş Kitabxana Sisteminin Mərkəzi Kitabxanasında şairə Ümmügülsüm Sadıqzadənin vəfatının 80 illiyinə həsr olunmuş  anım tədbiri keçirilib. Tədbiri giriş sözü ilə Səbail rayon MKS-nin direktoru Nərminə Xəlilova açıb.

Tədbirdə Nizami Gəncəvi adına Milli Azərbaycan Ədəbiyyatı Muzeyinin əməkdaşları, filologiya üzrə fəlsəfə doktoru Nəcibə Bağırzadə və “Komparativistika və bədii tərcümə” şöbəsinin elmi işçisi Solmaz Abdullayeva çıxış ediblər. Məhəmməd Əmin Rəsulzadə irsinin tədqiqatçısı, Rəsulzadələr haqqında “Gecikmiş etiraf kimi”,  “Rəsul Rəsulzadəyə məktub” kitablarının müəllifi Nəcibə Bağırzadə “Vətən ayrısı Rəsulzadələr” kitabındakı arzularını səsləndirərək Ümmügülsüm Sadıqzadənin şeirlərinin yenidən çap olunmasını, yaşadığı evə xatirə lövhəsinin vurulmasını və büstünün qoyulmasını, yaradıcılığının dərsliklərə salınmasını qeyd edib. Solmaz Abdullayeva isə müzakirələrə qoşularaq öz düşüncələrini bölüşüb.

Tədbirdə, həmçinin kitabxananın əməkdaşları Cəmilə Səmədova, Zeynəb Ziynəddinli, AMEA Nizami Gəncəvi adına Ədəbiyyat İnstitutunun filologiya üzrə fəlsəfə doktoru Rasim Nəbioğlu iştirak ediblər.

Sonda şairin nəvəsi  biologiya elmləri üzrə fəlsəfə doktoru, dosent Gülər Sadıqzadə çıxış edərək xatirələrini söyləyib, tədbirlə bağlı fikirlərini bölüşüb və tədbirin təşkili üçün Mərkəzi Kitabxanaya təşəkkürünü bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.