Mədəniyyət kanalında “Vətənim” verlişinin Azərbaycan ədəbiyyatının görkəmli nümayəndəsi, böyük dramaturq, nasir, publisist, tanınmış ictimai xadim Əbdürrəhim bəy Haqverdiyevə həsr olunmuş buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verlişdə ədibin həyat və yaradıcılığına nəzər salınıb, onun milli düşüncənin inkişafında əhəmiyyətli rol oynadığı diqqətə çatdırılıb. Bildirilib ki, Ə.Haqverdiyev müasir dünyagörüşlü maarifpərvər ziyalı kimi çoxşaxəli fəaliyyət göstərib. O, Azərbaycanın ictimai həyatında da fəal iştirak edərək sosial-mədəni quruculuq işlərində yorulmadan çalışıb.

Qeyd olunub ki, Əbdürrəhim bəy Haqverdiyev Azərbaycan tarixinin mühüm bir dövrünü öz əsərlərində əks etdirib. O, 1892-ci ildə Sankt-Peterburqda ilk səhnə əsəri olan "Yeyərsən qaz ətini, görərsən ləzzətini” adlı pyesini yazıb. Daha sonra “Dağılan tifaq”, “Bəxtsiz cavan” pyeslərini qələmə alıb və istedadlı bir dramaturq kimi tanınıb. “Bəxtsiz cavan” pyеsini 1900-cü ildə Şuşada yazıb.

Verilişdə akademik Rafael Hüseynov ədibin ömrünün son illərində qələmə aldığı tərcümeyi-halını diqqətə çatdırıb, yazıçının “Mоlla Nəsrəddin” jurnalı və xüsusən Cəlil Məmmədquluzadə haqqında xatiratlarındən bəhs edib. O, Əbdürrəhim bəy Haqverdiyevin 1933-cü ildə çəkilmiş fotosunun yadigar qaldığını söyləyib.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.