15-17 oktyabr tarixlərində “Mədəni irsin Konservasiyasında Gənclər – YOCOCU” IX Beynəlxalq İstanbul Konfransı (YOCOCU, İtaliya. Mədəni İrsin Qorunması üzrə Gənclər Dərnəyi) bu il Türkiyə Cümhuriyyətinin İstanbul şəhərində keçirilib. Bu dəfəki konfransın  İstanbulda keçirilməsinin əsas səbəbi bu şəhərin zəngin maddi-mədəni irsə sahib olması, yüksək  mədəniyyəti ilə seçilməsi, həmçinin keçmişin izləri ilə dolu tarixi yerlərinin olması ilə bağlı olub.

Konfransın əsas təşkilatçıları Mərkəzi Romada yerləşən Beynəlxalq YOCOCU Asossiasiyası və İstanbul Universitetidir. İtaliya Atmosfer Elmləri və İqlim İnstitutu, Türkiyə Mədəni İrsin Dostları İctimai Birliyi (KUMİD), İtaliya Kalabriya Universiteti, Mədəni Mülkiyyətlərin Qorunması və Bərpasının Öyrənilməsi üzrə Beynəlxalq Mərkəz (ICCROM), Azərbaycan “Miras” Mədəni İrsin Öyrənilməsinə Kömək İctimai Birliyi, Rumıniya Timişoara Milli İncəsənət Muzeyi, Türkiyə Konservasiyaçılar və Bərpaçılar İctimai Birliyi (KRD), Çexiya Yaşıl Laboratoriya Təşkilatı, İtaliya EMEC Su Cihazları Şirkəti, Heritage jurnalı konfransa dəstək olublar. Konfransın açılış mərasimi və bölmə iclasları İstanbul Universitetinin Prof.Dr. Fuad Sezgin konqres mərkəzində baş tutub. Konfransda Türkiyə, İtaliya, Azərbaycan, Yunanıstan, İspaniya, Almaniya, Rumıniya, Portuqaliya, Fransa, Avstriya, ABŞ, Xorvatiya, Rusiya, Böyük Britaniya, İran, Pakistan, Hindistan, Misir, Avstraliya və digər ölkələrdən 120-dən çox alim və tədqiqatçı canlı, poster və onlayn məruzələrlə çıxış edib. Konfransın açılış mərasimində Beynəlxalq YOCOCU Asossiasiyasının vitse-prezidenti Dr. Fernanda Prestileo çıxış edib. O, əvvəlki konfranslar haqqında məlumat verib, doqquzuncu konfransın mövzusundan və əhəmiyyətindən danışıb. Konfrans təşkilat komitəsinin üzvlərinin çıxışları ilə davam edib. Konfransda bölmələr üzrə “Mədəni irs strategiyaları: innovativ muzeylər, təhsil və qiymətləndirmə”, “Mühitin və mədəni irsin qorunması və qiymətləndirilməsi: metodlar, materiallar, strategiyalar, nümunələr” və “Mədəni irsdə yeni sərhədlər: innovasiya, rəqəmsal texnologiyalar və kommunikasiya” mövzuları əsasında çıxışlar və müzakirələr  aparılıb.  

Konfransda “Miras” Mədəni İrsin Öyrənilməsinə Kömək İctimai Birliyinin dəstəyi ilə Nizami Gəncəvi adına Milli Azərbaycan Ədəbiyyatı Muzeyinin əməkdaşları filologiya üzrə fəlsəfə doktoru Sevinc Heydərova “Azərbaycan mədəniyyətinin təbliğində Nizami muzeyinin  rolu”, kulturologiya üzrə fəlsəfə doktoru Nailə Əliyeva “Roma Panteonu və Nizami muzeyinin memarlığı” mövzuları əsasında poster təqdimat ediblər.           

IX Beynəlxalq İstanbul YOCOCU Konfransının təşkili mədəni irsdə yaranan problemlərə dair konstruktiv, tənqidi və fənlərarası müzakirələri təşviq etmək məqsədi daşıyıb. YOCOCU-2024 peşəkarlardan tutmuş akademik tədqiqatçılara və vətəndaşlara qədər mədəni irsin bütün səviyyələrində toplanmış zəngin təcrübə, sübut  və yaxşı təcrübələrlə dəstəklənən ilham və ideya mənbəyi olmağı hədəfləyib.               

Sonda konfransın yekununda Miras Mədəni İrsin Öyrənilməsinə Kömək İctimai Birliyinin sədri tarix üzrə fəlsəfə doktoru Fariz Xəlilli Beynəlxalq YOCOCU Asossiasiyasının növbəti “Mədəni İrsin Yaşıl Konservasiyası” VI beynəlxalq elmi-praktiki konfransının 2025-ci ildə Şuşa şəhərində keçirilməsi təşəbbüsü ilə çıxış edib və İdarə heyətinə təqdim edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.