Oktyabrın 16-18 tarixlərində Milli Xalça Muzeyinin və Azərbaycan Mədəniyyət Nazirliyinin təşkilatçılığı, MDB ölkələrinin Dövlətlərarası Humanitar Əməkdaşlığı Fondunun dəstəyi ilə   “Tikmə sənəti”  adlı beynəlxalq konfrans keçirilib.

Konfransa Azərbaycan, Belarus, Rusiya, Gürcüstan, Qazaxıstan, Özbəkistan, Qırğızıstandan dəvət olunmuş  tədqiqatçılar qatılıb. Akademik sessiyalarda “Dünya xalqlarının bədii tikmə ənənələri”, “Müxtəlif ölkələrin yerli tikmə məktəbləri”, “Tikmələrin bərpa və konservasiyası”, “Tikmə ənənəvi geyim bəzəyi kimi”,  “Tikmə sənəti müasirlik kontekstində”,  “Tikmə sənətində təsvir və naxışların semantikası”  mövzuları əsasında məruzələr dinlənilib və fikir mübadiləsi aparılıb.

Konfransda Nizami Gəncəvi adına Milli Azərbaycan Ədəbiyyatı Muzeyini  Komparativistika və bədii tərcümə şöbəsinin elmi işçisi Zarema İbrahimova təmsil edib. O, “Xan qızı şairə Xurşidbanu Natəvanın unikal əl işləri” mövzusunda çıxış edib.  Zarema İbrahimova məruzəsində Qarabağın sonuncu xanı Mehdiqulu xanın qızı, şairə Xurşidbanu Natəvanın həm Nizami Muzeyində, həm də Azərbaycan Milli Tarix Muzeyində sərgilənən nümunələrindən, eləcə də  Məhəmməd Füzuli adına Əlyazmalar İnstitutunda saxlanılan, UNESCO tərəfindən yüksək qiymətləndirilən “Gül dəftəri”ndən bəhs edib.      

Sonra “Tikmə sənəti” beynəlxalq elmi konfransının iştirakçıları Azərbaycan Milli Xalça Muzeyinin fondunda bədii tikmə nümunələri, Bərpa,  ənənəvi texnologiya və Uşaq muzeyi şöbələri ilə tanış olublar.

Sonda Azərbaycan Milli Xalça Muzeyinin direktoru, sənətşünaslıq üzrə fəlsəfə doktoru Əminə Məlikova tərəfindən konfrans iştirakçılarına təşəkkürnamələr təqdim edilib.  

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.