Mədəniyyət kanalında Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında “Vətənim” verlişinin növbəti buraxılışı yayımlanıb.

Budəfəki veriliş dahi Məhəmməd Füzulinin şair oğlu Fəzli Bağdadiyə həsr olunub.

Verilişdə akademik Rafael Hüseynov bildirib ki, müdrik Füzuli oğluna öyüd-nəsihətlər vermiş, gələcəkdə hansı peşəni seçməyin daha məqsədəuyğun olduğunu tövsiyyə etmişdir. Lakin o, oğluna şairliyin ardınca getməməyi məsləhət görmüşdür.

"Füzilinin "Divan"ında onun oğluna etdiyi nəsiyyətlərin əks-sədası qalmaqdadır", - deyən Rafael Hüseynov vurğulayıb ki, şairin yeganə oğlu Fəzli dövrünün görkəmli ziyalılarından olmuş, hətta şair kimi tanınmış, daha çox müəmma və “maddeyi-tarix”lər yazmışdır. O, Füzulinin şair övladının şeirlərinə bələd, ömür yoluna aşina olmağın vacibliyini qeyd edib. Bildirib ki, Fəzli dahi Füzulinin həyatının davamıdır. Onun surətini çatdıran heç bir rəsm əsəri bizə gəlib çatmasa belə, Fəzlinin şeirlərinin bir suyu Füzulininkinə çəkir. Füzuli şeirlərinə ruh yaxınlığı, deyiliş bənzərliyi Fəzlinin şeirlərində duyulmaqdadır.

Diqqətə çatdırılıb ki, Fəzlinin əsl adı Fəzli Çələbi Füzulizadədir. O, atasının şərəfinə Fəzli adını götürmüşdür. Şairin poetik təhsilini Füzulidən aldığı, Azərbaycan, fars və ərəb dillərində həm dini, həm də dünyəvi şeirlər yazdığı güman edilir. Mənbələr təsdiq edir ki, Fəzlinin türkcə, farsca və ərəbcə "Divan"ları olub. Fəzli haqqında ən gerçəkçi məlumatları bizə çatdıran Əhdi Bağdadi təzkirəsində şairin "Divanlar"ına durmadan yeni şeirlər əlavə etdiyini bildirib. O, şeirlərinə tez-tez sevgi mövzularını daxil etdiyi üçün "eşq şairi" də adlandırılıb.

Akademik Rafael Hüseynov qeyd edib ki, Əhdi Bağdadi Fəzlinin yaradıcı mahiyyətini bütün ayrıntıları ilə təqdim edərək, şairin sağlam düşüncə və təbii ilhamın bəhrəsi olan ağlın səfası ilə bəzəndiyini vurğulayıb. Həmçinin Əhdi Bağdadi Fəzlinin danışığının gözəlliyinə, natiqliyinə işarə edib, onun müəmmaları açmaqda müstəsna olduğunu bildirib.

"Fəzli haqqında ilk geniş məlumatı bizə Əhdi Bağdadi versə də, XX yüzildə şair haqqında ilk tutarlı yazını İsmayıl Hikmət qələmə alıb. O, 1928-ci ildə yazdığı "Azərbaycan ədəbiyyatı tarixi" kitabında Fəzli barədə geniş söhbət açır, ədibin yazdıqlarını həm atasının, həm də digər bağdad şairlərinin əsərləri ilə müqayisə edib. Bundan başqa, Ruhi Bağdadi şeirlərində Füzulinin oğlu Fəzlinin yaradıcılığının, şəxsiyyətinin özünəməxsus xüsusiyyətini açır", - deyə akademik Rafael Hüseynov bildirib.

Verilişdə, həmçinin Fəzlinin atası ilə münasibətlərindən, Füzulinin ərəb dilində yazdığı "Fəzliyə nəsihət" şeirindən bəhs olunur.

Yeni buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.