Bu il görkəmli rus şairi, yazıçı və dramaturqu Mixail Lermontovun anadan olmasının 210 illiyidir. İl boyu bu münasibətlə ölkəmizdə müxtəlif tədbirlər təşkil olunur. Belə tədbirlərdən biri də Bakıdakı Rus Evi – Rusiya İnformasiya-Mədəniyyət Mərkəzinin (RİMM) təşkilatçılığı ilə Azərbaycan Musiqi Mədəniyyəti Dövlət Muzeyində keçirilib.

Mixail Lermontovun 210 illiyinə həsr olunmuş ədəbi-musiqili tədbirin açılışı qonaqların Rusiyanın “Tarxanı” Dövlət Lermontov Qoruq-Muzeyinin (Penza vilayəti) hazırladığı şairin şeirlərində tərənnüm etdiyi mənzərə tablolarından ibarət sərgi ilə tanışlıqdan başlayıb.

Sonra Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru Alla Bayramova çıxış edərək şairin zəngin irsindən bəhs edib. O, Azərbaycanda Lermontov yaradıcılığına hər zaman böyük maraq olduğunu söyləyib.

Tədbirdə Nizami Gəncəvi adına Milli Azərbaycan Ədəbiyyatı Muzeyinin filialı olan Sergey Yesenin adına Rus-Azərbaycan Ədəbi Əlaqələr Mərkəzinin rəhbəri, filologiya üzrə fəlsəfə doktoru Natəvan Mustafayeva da iştirak edib. “Lermontov və Qafqaz” adlı məruzəsini təqdim edən Natəvan Mustafayeva şairin həyat və yaradıcılığında Qafqazla bağlılığından, onun Azərbaycana səfərindən, həmçinin Abbasqulu ağa Bakıxanov, İsmayıl bəy Qutqaşınlı, Mirzə Fətəli Axundzadə ilə görüşlərindən danışıb.

Məruzə iştirakçılar tərəfindən maraqla qarşılanıb.

Daha sonra tədbirdə Bakı Xoreoqrafiya Akademiyasının müəllimi Nigar Mirzəzadənin, Yasamal rayonu Mərkəzləşmiş Kitabxana Sisteminin direktoru Lətifə Məmmədovanın, M.Lermontova həsr olunmuş “Qafqazın poetik abidəsi” kitabının müəllifi, yazıçı-publisist Reyhan Mirzəzadənin, filologiya elmləri doktoru Leyla Vəzirovanın, eləcə də tədbirin bədii rəhbəri, Bakıdakı Rus Evinin maarifləndirmə proqramlarının koordinatoru Lyubov Yakuninanın şairin yaradıcılığı və Qafqaz həyatı haqqında çıxışları dinlənilib.

Tədbirin bədii hissəsində “Günay” Uşaq Teatrı tərəfindən ədəbi-bədii kompozisiya təqdim olunub. Həmçinin Azərbaycan Dövlət Akademik Musiqili Teatrının solisti Yuliya Heydərova, Bakı Musiqi Akademiyasının baş müəllimi Alyona İnyakina, Üzeyir Hacıbəyli adına Bakı Musiqi Akademiyasının vokalçısı Yelena Yakubovskaya və Əminə Əhmədovanın ifasında şairin sözlərinə yazılmış romanslar səsləndirilib. Gənc aşıq Məhəmməd Muradov isə aşıq musiqisi ifa edib.

Yubiley tədbiri Mixail Lermontovun yaradıcılığına həsr edilmiş qiraət nümunələri və videoyazılarla davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.