Bu il COP29-a ev sahibliyi edən ölkəmizdə media tərəfdaşları COP29 çərçivəsində aparılacaq müzakirələri təşviq etmək və iqlim fəaliyyətinə təkan vermək baxımından vacib rol oynayacaqlar. Qlobal auditoriya ilə COP29 arasında təmas yaratmaq üçün tədbiri daha əlçatan və inklüziv edən rəqəmsal texnologiyalardan da istifadə olunub. 

BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) qeydiyyatdan keçmiş 72 min əcnəbi qonaq sırasında dünyanın əksər ölkələrini təmsil edən mətbuat nümayəndələri də yer alıb.

Tədbir çərçivəsində əməkdaşlıq edən “FT Live”, “Project Syndicate”, “Newsweek”, “CBC” və “ANEWZ" COP29-un rəsmi media tərəfdaşları ilə yanaşı digər media əməkdaşları da ölkəmizlə yalnız COP29 proqramı çərçivəsində maraqlanmır, həmçinin qonaq olduqları ölkənin tarixi, ədəbiyyatı və mədəniyyəti ilə də yaxından tanış olub sosial media, onlayn platformalar vasitəsilə bütün dünyaya tanıtmaq niyyətindədirlər. 

Bu məqsədlə ölkəmizdə olan media əməkdaşı Nizami Gəncəvi adına Milli Azərbaycan Ədəbiyyatı Muzeyini böyük maraq və zövqlə ziyarət edib. 

Amerika Birləşmiş Ştatlarından jurnalist Lyuk Hardi Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovla görüşüb. Akademik Rafael Hüseynov onları maraqlandıran çoxsaylı sualları cavablandırıb və muzeyin nəşr etdiyi kitablardan hədiyyə edib.

Muzeyin elmi işçisi Aymən Həsənova jurnalist Lyuk Hardini Nizami Muzeyinin ekspozisiyası ilə tanış edib. Zəngin ekspozisiya ilə yaxından tanış olan amerikalı jurnalist Lyuk Hardi Azərbaycanın qədim və orta əsrlər tarixinə aid muzeydə qorunan nadir eksponatlara xüsusi maraq göstərib. Amerikalı jurnalist burada gördüklərindən geniş məqalə yazacağını və mətbuatda işıqlandıracağını bildirib. 

Sonda amerikalı jurnalist Nizami muzeyinin rəylər və təəssüratlar kitabına ürək sözlərini yazıb. Lyuk Hardi qeyd edib ki, Azərbaycana gəlişinin hələ yalnız ilk günlərinin olmasına baxmayaraq, Nizami Muzeyində gördükləri onda artıq xalqımızın qədim tarixi, mədəniyyəti, adət və ənənələri haqqında dolğun təsəvvür yaradıb. O, Nizami Muzeyini xalqını və ölkəsini layiqincə təqdim etməyə qadir olan sərvətlər xəzinəsi kimi mənalandırıb. 

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.