Avstraliyadakı Kurtin Universitetinin (əvvəlki adı Kurtin Texniki Universiteti və Qərbi Avstraliya Texniki İnstitutu) tələbələri  BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) iştirak etmək üçün Azərbaycana gəliblər,  həmçinin Nizami Gəncəvi adına Milli Azərbaycan Ədəbiyyatı Muzeyində də olublar.

Ekspozisiya ilə muzeyin kiçik elmi işçisi Nəzrin Yusifovanın vasitəsilə yaxından tanış olan tamaşaçıların Nizami Gəncəvi, İmadəddin Nəsimi irsi  hədsiz maraqlarına səbəb olub. Əsasən, Azərbaycan ədəbiyyatında, mədəniyyətində  ilklər – XII əsrdə yaşamış şairə  Məhsəti Gəncəvi, Nizami Gəncəvinin “Xəmsə”si, ilk  diplomat qadın Ağqoyunlu dövlətinin qurucusu Uzun Həsənin anası Sara Xatın, dünyada ilk beş qadın dövlət idarəçisindən massegetlərin hökmdarı Tomris xatın, Müsəlman Şərqində ilk qadın opera bəstəkarı Şəfiqə Axundova, Üzeyir Hacıbəylinin bəstələdiyi, 1908-ci ildə tamaşaya qoyulmuş “Leyli və Məcnun” operası haqqında məlumatdan məmnun qalıblar.

COP29 iştirakçıları Azərbaycanın adət-ənənələrini daha çox seviblər. Azərbaycan xalqının dini bayramları ilə maraqlanan qonaqlar bu bayramların  dövlət səviyyəsində qeyd edildiyini öyrəniblər. Azərbaycanlıların ən çox qorunan adət-ənənələrindən  qız-gəlinlərimizin əllərinə çəkdikləri xına mərasimi də onlara maraqlı olub və avstraliyalı ziyarətçimiz Custinia Tereza xına  ilə əlinə bəzək çəkdirib.

Sonda qonaqlarmız bitib-tükənməyən təəssüratlarını muzeyin rəylər və təəssüratlar kitabında xatirə olaraq yazıblar. Zimbabvedən Kurtin Universitetinin tələbəsi Hazel Fadzai memarlıq tələbəsi olaraq binanın zahiri görüntüsündən daxili memarlığına qədər olan incəliklərə valeh olduğunu, binanın, həmçinin daxilindəki hər məkanın muzeyin amalına uyğun şəkildə istifadə olunmasını təqdirəlayiq olduğunu qeyd edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.