Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki buraxılış Azərbaycanın klassik bəstəkarı, dirijor, Azərbaycanın və müsəlman Şərqinin ilk baleti olan “Qız qalası”nın müəllifi, Əməkdar incəsənət xadimi, Xalq artisti Əfrasiyab Bədəlbəyliyə həsr edilib.

Verilişdə görkəmli bəstəkarın həyat yoluna və yaradıcılığına nəzər salan akademik Rafael Hüseynov onun Azərbaycan mədəniyyəti tarixindəki müstəsna xidmətlərindən danışıb. Bildirilib ki, Əfrasiyab Bədəlbəy oğlu Bədəlbəyli 19 aprel 1907-ci ildə Bakı şəhərində, xalq maarifçisi Bədəlbəy Bədəlbəyovun və məşhur Şah Qacar nəslinin təmsilçisi Rəhimə xanımın ailəsində anadan olub: "Əfrasiyab Bədəlbəyli ömrü boyu kiçik, darısqal evdə yaşasa da, əslində həmin ev Azərbaycan boyda idi. Çünki, Azərbaycanı daha zövqlü, daha üstün edəcək neçə zərif musiqi, neçə qiymətli kitab səs-səs, söz-söz həmin o mənzildə yaranırdı. O evin sahibi bütün yurda düşüncə işığı saçan bir müdrik millət müəllimi idi".

Akademik Rafael Hüseynov qeyd edib ki, bəstəkarın 60-cı illərdə Azərbaycan gerçəkliyində böyük əks-sədalar doğurmuş, indi isə ayrı-ayrı kitabxanalarda nüsxələri qalan musiqi lüğəti kitabı 6 il öncə əlavələr edilərək yenidən nəşr olunub. Onun sözlərinə görə, “Əfrasiyab Bədəlbəyli. İzahlı monoqrafik musiqi lüğəti” kitabının yeni nəşrinin təqdimatı Milli Azərbaycan Ədəbiyyatı Muzeyində baş tutub. Lüğətin 472 səhifəlik yeni nəşrində dövrlə bağlı ictimai və elmi fikirdə baş verən dəyişikliklər nəzərə alınaraq bir sıra redaktə işləri aparılıb. Azərbaycan musiqi elminin qiymətli abidələri sırasına daxil olan bu kitab janrı və yazılış üslubu etibarı ilə bənzəri olmayan ciddi tədqiqat əsəridir. Kitabın yenidən nəşr olunması böyük sənətkarın 110 illik yubileyinə, Azərbaycan musiqi mədəniyyətinin inkişafına böyük töhfədir. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.