Mədəniyyət kanalında “Vətənim” verlişinin Azərbaycan şairi Məşədi Azər Buzovnalıya həsr olunan ikinci buraxılışı yayımlanıb.
Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə şairin zəngin irsi barədə məlumat verilib, həmçinin Abşeron muğamlı-şeirli gecələrindən bəhs olunub.
Akademik Rafael Hüseynov bildirib ki, bir şair, qələm sahibi olaraq Məşədi Azər klassik ülgüyə tam uyğun idi - üçdilli idi. Ancaq onun yaradıcılığını, həyata baxışını, fəlsəfəsini göz önünə gətirərkən bunu da təsdiqləməliyik ki, o, daha çox türkçüydü. Bu, əvvəla, onun milli mövqeyi həmişə çox aydın olmuş Əlişir Nəvaini özünə ustad saymasında görünməkdədir.
Qeyd olunub ki, 1928-ci ildə Azərbaycan Ədəbiyyat Cəmiyyəti yarananda onun ilk və ən fəal üzvlərindən biri Məşədi Azər olub. O vaxt Məşədi Azərin yaşı altmışa çatırdısa da, içərisi gənclik şövqü ilə dolu idi. Şair ömrü boyu müxtəlif məktəblərdə Azərbaycan dili və ədəbiyyatı, həmçinin fars dilini tədris edib. Dərs deməyəndə də bir sıra məktəblərdə tərbiyəçi işləyib.
"Rəsmən yaradılan ilk şairlər cəmiyyətinə, əslində Azərbaycanın gələcək Yazıçılar Birliyinə ən əvvəlincilərdən üzv olması çox təbii idi. Ona görə ki, Məşədi Azərin o cəmiyyət yaranmazdan əvvəl artıq onun öz Yazıçılar Birliyi vardı -"Məcmə üş-Şüəra"! Lakin Azərin qonaq-qara üzünə həmişə açıq qapısını da şairlər tez-tez döyərdi, onun öz evi də ayrı bir şairlər məclisi idi", - deyə bildirən Rafael Hüseynov şairin Əlişir Nəvaini ustadı olaraq qəbul etdiyini, tanıdığı fars, türk, ərəbdilli şairlərin içərisində də onu ən üstün saydığını vurğulayıb.
Verilişi buradan izləyə bilərsiniz.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.