Bakı Xoreoqrafiya Akademiyasında milli istiqlal şairi, Azərbaycan Xalq Cümhuriyyətinin qurucularından Əhməd Cavad Axundzadənin həyat və yaradıcılığına həsr olunmuş “Əhməd Cavadın Azərbaycan tarixində və ədəbiyyatında rolu” mövzusunda tədbir keçirilib.

Tədbirdə Yeni və müasir Azərbaycan ədəbiyyatının tədqiqi və təqdimi şöbəsinin böyük elmi işçisi, filologiya üzrə fəlsəfə doktoru, dosent Göyərçin Mustafayeva Nizami Gəncəvi adına Milli Azərbaycan Ədəbiyyatı Muzeyini təmsil edib.

Elmi fəaliyyətini Əhməd Cavad yaradıcılığına həsr edən Göyərçin Mustafayeva tədbirdə şairin Cümhuriyyət dövrü yaradıcılığı və repressiyaya uğramasından bəhs edən “İstiqlal şairi” adlı məruzə ilə çıxış edib.

Tədbirdə, həmçinin tarixçi alim, professor Solmaz Rüstəmova-Tohidi, Əhməd Cavadın nəvəsi (Niyazi Axundzadənin qızı) Almaz xanım və Mikayıl Müşfiqin həyat yoldaşı Dilbər Axundzadənin qızı Leyla xanım iştirak ediblər.

Sonda Bakı Xoreoqrafiya Akademiyasının tələbələrinin ifasında rəqs nümunəsi tədqim edilib, Əhməd Cavadın yaradıcılığından “Çırpınırdın Qara dəniz” və “Şükriyyə” şeirlərinə bəstələnmiş musiqilər səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.