Xəzər Universiteti  Mövlana Ədəbi-Fəlsəfi Araşdırmalar İnstitutu (MƏFAİ) və Şimali Kipr Yaxın Şərq Universiteti Rumi Araşdırmaları Mərkəzinin birgə təşkilatçılığı ilə dekabrın 12-14-də Xəzər Universitetində mütəfəkkir şair Mövlana Cəlaləddin Rumiyə həsr olunmuş “Mövlana, mövləvilik, təsəvvüf, hikmət”  mövzusunda IX Beynəlxalq Rumi Elmi Simpoziumu keçirilmişdir.

Üzbəüz bölmələrlə yanaşı, onlayn  formada da təşkil edilmiş simpoziumu giriş sözü ilə Xəzər Universitetinin Direktorlar və Qəyyumlar Şurasının həmsədri, professor Hamlet İsaxanlı açaraq qonaqları salamlayıb və Şərqin böyük filosof-şairinə həsr olunmuş növbəti simpoziumun Bakıda keçirilməsinin sevindirci hal olduğunu bildirib.

Sonra Şimali Kipr Yaxın Şərq Universiteti Rumi Araşdırmaları Mərkəzinin müdiri doktor Qadir Golkarian, Xəzər Universiteti Mövlana Ədəbi-Fəlsəfi Araşdırmalar İnstitutunun müdiri, filologiya elmləri doktoru, dosent Nəzakət Məmmədli çıxış ediblər.

Açılş mərasimi Xəzər Universiteti Musiqi Departamentinin Xəzər Universiteti tələbələrindən ibarət orkestri tərəfindən Azərbaycan bəstəkarlarının əsərlərinin ifası ilə başa çatıb.

Simpozium təntənəli açılış mərasimindən sonra plenar iclasın  çıxışları ilə davam edib.  

Plenar iclasda filologiya elmləri doktoru, dosent Nəzakət Məmmədli “Mövlana və Füzuli yaradıcılığında ney məcazı”, Şimali Kipr Yaxın Şərq Universiteti Rumi Araşdırmaları Mərkəzinin müdiri, doktor Qadir Golkarian “Mövlana təlimləri çərçivəsində idarəetmə və şəxsi inkişaf”, ABŞ Kaliforniya əyaləti “Rumi Qlobal Mərkəzi və Delnavaz radiosu” cəmiyyətini təmsil edən doktor Babək Safvat “Tanrının ziyafətində”, Pakistan İslam Respublikası Bəlucistan  Universitetinin professoru Ali Kumail Qızılbaş “İqbal Lahori Mövlananın və Şəms Təbrizinin mürididir”, Bakı Dövlət Universitetinin professoru Əsmətxanım Məmmədova “Mövlana yaradıcılığında fonetik əvəzlənmələrin səciyyəsi”, AMEA Fəlsəfə və Sosiologiya İnstitutunun professoru, fəlsəfə elmləri doktoru Eynulla Mədətli “Ruminin “Divani Şəmsi Təbrizi” Reynold A.Nikolsonun tərcüməsi və şərhlərində”, Hindistanın Gauhati Universitetinin professoru Rekibuddin Ahmed “Mövlana Ruminin eşq fəlsəfəsi” adlı elmi məruzələrlə çıxış etdiblər.

Nizami Gəncəvi adına Milli Azərbaycan Ədəbiyyatı Muzeyinin əməkdaşları da simpoziumun bölmə iclaslarında məruzə ediblər. Filologiya üzrə fəlsəfə doktoru Gülnar Əqiq “Mövlana irsinin Şəms Məğribi Divanında təzahürü”  mövzusunda çıxış edib. O, öz məruzəsində  mütəfəkkir şair Mövlanə Cəlaləddin Ruminin bəşəri əhəmiyyətli irsinin hicri XIV əsrin ikinci yarısı XV əsrin əvvəllərində yaşamış Azərbaycan şairi  Şəms Məğribi Təbrizinin də yaradıcılığına güclü təsir göstərdiyini vurğulayıb.

Muzeyin böyük elmi işçisi, filologiya üzrə fəlsəfə doktoru Nərmin Əliyeva da simpoziumun bölmə iclasında  “Rumi şeirlərində kamil insan obrazı” mövzusunda məruzə ilə çıxış edərək Ruminin bədii-irfani düşüncə aləmində insana azadlıq bəxş edən mənəvi ucalıq məfhumunun  mühüm yer tutduğundan bəhs edib və onun kamil insan konsepsiyasının bəşəriyyət üçün daim aktuallıq kəsb etdiyini qeyd edib.

Üç gün ərzində davam edən simpozium Azərbaycanla yanaşı Türkiyə, Şimali Kipr Respublikası, Qazaxıstan, Özbəkistan, ABŞ, Canada, İran, Pakistan, Hindistan və digər ölkələrdən olan alim və tədqiqatçıların maraqlı çıxış və diskussiyaları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.