Görkəmli şərqşünas alim, Ümumittifaq Şərqşünaslar Cəmiyyəti Rəyasət Heyətinin üzvü, professor Aida İmanquliyevanın anadan olmasının 85-ci ildönümü Bakı Dövlət Universitetində “Ərəbşünaslıq və şərqşünaslıq: müasir dünyada mədəniyyətlərarası dialoq” mövzusunda respublika konfransı ilə qeyd edilib.

Konfransın “Aida İmanquliyevanın yaradıcılığında müasir ərəb ədəbiyyatı”, “Ərəb məhcər ədəbiyyatının tədqiqində Aida İmanquliyeva mərhələsi”, “Azərbaycan və Şərq ölkələri arasında mədəni əlaqələr”, “Orta əsr Şərq ədəbiyyatı”, “Müasir Şərq ədəbiyyatı”, “Qloballaşan dünyada Şərq dilləri”, “Qloballaşma şəraitində dildə mədəni inkişafın aktual məsələləri”, “Mədəniyyətlərarası ünsiyyət və tərcümənin inkişaf problemləri”, “Şərq dillərinin öyrənilməsi və tədrisinin aktual problemləri, “Tərcümənin nəzəri və praktiki problemləri”” mövzuları üzrə bölmə iclaslarında Nizami Gəncəvi adına Milli Azərbaycan Ədəbiyyatı Muzeyinin alimləri də iştirak edib. 

Muzeyin “Komparativistika və bədii tərcümə” şöbəsinin müdiri, filologiya elmləri doktoru, professor Şəfəq Əlibəyli “Məhəmməd Füzulinin təxəllüsünün avtoqraf epitetləri (leksik-semantik aspekt)”, muzeyin “Mədəni irs və mənbəşünaslıq” şöbəsinin baş elmi işçisi filologiya elmləri doktoru, BDU-nun professoru Aida Qasımova “Məhəmməd Füzulinin həmmamiyyə qəzəlinin ərəb ədəbiyyatındakı öncül nümunələri”, filologiya üzrə fəlsəfə doktoru Gülnar Əqiq “Came-Cəm: Şərq ədəbiyyatının didaktik-fəlsəfi ensiklopediyası”, filologiya üzrə fəlsəfə doktoru Nərmin Əliyeva ““Şere-nou” cərəyanının görkəmli nümayəndəsi Həbib Sahir”, “Beynəlxalq əlaqələr və dünya muzeyləri” şöbəsinin elmi işçisi Natəvan Bağırova “Xəbbaz əl-Bələdi poeziyasının əsas xüsusiyyətləri”, “Doktorantura və elmi inkişaf” şöbəsinin elmi işçisi Rəhilə Sadıqova “Azərbaycan ilə ərəb ölkələri arasındakı mədəni dialoqda ərəbdilli mütəxəssislərin rolu” mövzularında məruzələrlə çıxış ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.