Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram bu dəfə görkəmli sənətkar, bədii qiraət ustası, Xalq artisti Mikayıl Mirzəyə həsr olunub.

Verilişdə akademik Rafael Hüseynov Mikayıl Mirzənin zəngin ömür yolundan danışıb, istedadlı sənətkarla bağlı xatirələrini bölüşüb. Mərhum aktyoru Təbriz teatrında "Aydın"ı səhnələşdirərkən tanıdığını deyən akademik Rafael Hüseynov bildirib ki, Mikayıl Mirzə ondan bir kitab yazmağını istəyirdi və nəşr üçün bütün materialları verməkdə köməklik göstərəcəyini söyləyirdi.

O, Mikayıl Mirzə ilə Milli Məclisdə xeyli müddət bir yerdə işlədiklərini, Azərbaycan boyu və xarici səfərlərdə dəfələrlə bərabər olduqlarını deyib. Qeyd edib ki, istedadlı aktyoru erkən itirsək də, bu boşluq bu gün də duyurulur, gələcək boyu da daim hiss olunacaq.

Akademik Rafael Hüseynov Azərbaycan Dövlət Akademik Milli Dram Teatrında Mikayıl Mirzənin 70 illiyinə həsr edilmiş tədbirin aparıcısı olduğunu xatırladıb. Bildirib ki, Mikayıl Mirzə parlaq idi, o, şimşəyə bənzəyirdi. Şimşək kimi çaxdı və getdi. Lakin ani sönən şimşəklərdən fərqli olaraq Mikayıl Mirzə işığı heç vaxt sönməyəcək, səhnəmizin, xalqımızın və dostlarının yaddaşında həmişə parlamaqda davam edəcək.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.