Türkiyə Respublikasının Azərbaycandakı səfirliyinin ikinci katibi Ləvənt Kızılbağlı Nizami Gəncəvi adına Milli Azərbaycan Ədəbiyyatı Muzeyində qonaq olub. 

Qonağı ekspozisiya ilə muzeyin elmi işçisi Aysel Məhərrəmova tanış edib. Savalan dağının mənzərəsi, Azərbaycan klassik ədəbiyyatının görkəmli nümayəndələrindən Nizami Gəncəvinin “İskəndərnamə” poeması, İmadəddin Nəsimi, Məhəmməd Füzuli, XIX əsrin şairəsi Xurşidbanu Natəvan yaradıcılığı, xüsusən mühacirət və repressiya dövrünə həsr olunmuş ekspozisiya Ləvənt Kızılbağlının marağına səbəb olub. Hüseyn Cavid yaradıcılığı ilə tanışlıq, həmçinin Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun Hüseyn Cavid yaradıcılığından bəhs edən “Vaxtdan uca”, “Əbədi Cavid”, “Cavidlər” əsərləri barədə məlumatlar qonaqda Azərbaycan teatr səhnəsində Hüseyn Cavid əsərlərinə tamaşa etmək və Bakıdakı ev muzeyini ziyarət etmək istəyini yaradıb.

Bakının, əsasən Nizami muzeyinin onun qarşısında gözləntilərindən və xəyal etdiklərindən daha çox pəncərələr açdığını qeyd edən Ləvənt Kızılbağlı, muzeyin rəylər və təəssüratlar kitabına düşüncələrini yazıb. O, Azərbaycanın qədim tarixini bilmək üçün onun ədəbiyyatını, incəsənətini, poeziyasını, şairlərini tanıyıb dərk etməyin vacibliyini qeyd edib.  

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.