Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında “Mədəniyyət” kanalında efirə gedən “Vətənim” verilişinin 2025-ci ildəki ilk buraxılışı yayımlanıb.

Veriliş şərqin və müsəlman dünyasının ilk operası olan Üzeyir Hacıbəylinin "Leyli və Məcnun"un ilk premyerasının 117 illiyinə həsr olunub.

Bildirilib ki, “Leyli və Məcnun” operasının ilk tamaşası 1908-ci il yanvar ayının 25-də (12-də) məşhur xeyriyyəçi, sahibkar Hacı Zeynalabdin Tağıyevin teatrında (indiki Azərbaycan Dövlət Akademik Musiqili Teatrı) keçirilib. Bu opera ilə müsəlman Şərqində opera janrının əsası qoyulub. Dahi bəstəkar Üzeyir bəy Hacıbəyli tərəfindən yazılmış bu opera Məhəmməd Füzulinin eyniadlı poeması әsasında yaradılıb.

Akademik Rafael Hüseynov qeyd edib ki, görkəmli aktyor və rejissor Hüseyn Ərəblinskinin quruluş verdiyi “Leyli və Məcnun” operasının dirijoru yazıçı-dramaturq Əbdürrəhim bəy Haqverdiyev olub, əsərin bədii tərtibatını publisist, mütəfəkkir, rəssam Əli bəy Hüseynzadə verib. İlk tamaşanı Üzeyir bəyin seminariya yoldaşları olan həvəskar musiqiçilərdən ibarət orkestr səsləndirib. Muğam hissələrini ustad tarzənlər Qurban Pirimov və Şirin Axundov müşayiət ediblər. Məcnun rolunun ilk ifaçısı görkəmli teatr və musiqi xadimi Hüseynqulu Sarabski idi.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.