Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin Mərkəzi Kitabxanasında Azərbaycanın Xalq şairi Zəlimxan Yaqubun anadan olmasının 75 illik yubileyi ilə bağlı “Sazla, sözlə çağlayan, daşan şair!” adlı dəyirmi masa keçirilib.

Tədbiri giriş sözü ilə MKS Mərkəzi Kitabxanasının direktoru Nərmin Xəlilova açaraq Azərbaycan poeziyasının qüdrətli saz, söz ustadı Zəlimxan Yaqubun həyat və yaradıcılığından, ədəbiyyatımızda mövqeyindən, aşıq sənətinin inkişaf istiqamətində yorulmaz fəaliyyətindən danışıb. Xalq şairi Zəlimxan Yaqub yaradıcılığının işığına yığışan iştirakçıları salamlayıb.

Sonra tədbir Mərkəzi Kitabxananın Metodika və biblioqrafiya şöbəsinin müdiri Şəbnəm Babaşovanın çıxışı ilə davam edib.

Tədbirdə Nizami Gəncəvi adına Milli Azərbaycan Ədəbiyyatı Muzeyini Filiallarla iş üzrə direktor müavini Ləman Muxtarova təmsil edib. Məruzəçi “Xalqın şairi, xalqın millət vəkili” mövzusunda çıxış edərək şairin həyat yolundan söz açıb və yubileyin məhz bu məkanda keçirilməsinin təsadüfi olmadığını söyləyib. Qeyd edib ki, Zəlimxan Yaqubun kitaba bağlılığı, Azərkitabla başlayan yol və bu yolun  davamı olaraq Kitabsevərlər Cəmiyyətinin təbliğat şöbəsi, Yazıçılar Birliyi, millət vəkilliyi və tükənməyən yaradıcılığı şairin həyatının ən gözəl səhifələri olub. Məruzəsində Zəlimxan Yaqubun “Yolum eldən başlayır”, “Od aldığım ocaqlar” və s. kitablarını xatırladan Ləman Muxtarova

Ayaz nədir, şaxta nədir, bürkü nə,

Nə qorxudar haqq yolunda türkü, nə?..

misralarını söyləyərək vətənpərvər şairin heç bir ayazın, şaxtanın milləti haqq yolundan döndərməyəcəyinə inandığını vurğulayıb. 

Tədbirdə, həmçinin mədəniyyət işçiləri, Azərbaycan Milli Konservatoriyasının tərkibində İncəsənət Gimnaziyasının, 189-190 saylı orta məktəbin müəllim və şagird kollektivi iştirak ediblər.

Sonda şairin yaradıcılığını əks etdirən kitab sərgisi və videoçarx nümayiş olunub,  şeirlərindən nümunələr səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.