Hər il ölkəmizdə 2 Fevral – Gənclər Günü kimi qeyd edilir. İlk dəfə Ulu Öndər Heydər Əliyevin təşəbbüsü ilə 1996-cı ildə Azərbaycanda Birinci Gənclər Forumu keçirilib.1997-ci ildə isə Ulu Öndər Heydər Əliyevin sərəncamı ilə Azərbaycan Gəncləri Günü elan edilib.

2003-cü ildən sonrakı dövrdə Prezident İlham Əliyev gənclər siyasətinin inkişaf istiqamətini mövcud ənənələr əsasında daha da təkmilləşdirdi. Xüsusi bacarığı ilə seçilən sağlam, intellektual və zəngin dünyagörüşlü gənclərə qayğı artırıldı.

Gənclər Günü, həmçinin bütün istiqamətlər üzrə fəaliyyət göstərən gənclərin yekun hesabatıdır. Bu gün münasibətilə regionlarda da müxtəlif tədbirlər keçirilib. Kürdəmir Rayon İcra Hakimiyyətinin başçısı Elxan İbrahimov rayonun ictimai-mədəni həyatında fəal iştirak edən, müxtəlif qurumlarda çalışan gənclərlə görüşüb. Diskussiya şəraitində keçən görüşdə gənclər ölkəmizdə yaradılan şəraitdən danışıb, onların gələcək ideya və layihələri müzakirə edilib. Rayonun müxtəlif istiqamətlərdə seçilən gəncləri icra başçısı Elxan İbrahimov tərəfindən fəxri fərmanlarla təltif olunublar. Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialının əməkdaşı  Nuray Muxtarzadə də rayonun ictimai-mədəni həyatında fəaliyyətinə görə fəxri fərmanla təltif edilib. Rayon gəncləri ilə görüşən Elxan İbrahimov onlara regionların mədəni inkişafındakı ictimai fəaliyyətlərinin əhəmiyyətini vurğulayıb.

Sonda Gənclər Günü münasibətilə gəncləri təbrik edən Elxan İbrahimov  onlara gələcək fəaliyyətlərində uğurlar diləyib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.