Mədəniyyət kanalında “Vətənim” verilişinin klarnet-saksofon ifaçısı, dirijor, bəstəkar, Xalq artisti Tofiq Əhmədova həsr olunan ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə Tofiq Əhmədovun zəngin yaradıcılığına nəzər salınıb.

Bildirilib ki, rejissor Kamil Rüstəmbəyovun 1962-ci ildə çəkdiyi musiqili filmlərindən biri Tofiq Əhmədovun estrada-caz orkestrinə həsr olunmuşdu, həmin film "Tofiq Əhmədovun orkestrinin konserti" adlanırdı. Filmdə istedadlı estrada musiqiçisi Tofiq Əhmədovun rəhbərlik etdiyi və baş dirijoru olduğu estrada orkestrinin çıxışları səslndirilib. Ümumiyyətlə, həmin illərdə filmlərdə yer alan mahnıların əksəriyyəti insanların sevdiyi nəğmələrə çevrilib.

"Həmin illərdə coşqun inkişafını yaşayan Azərbaycan milli cazı və estradası kinofilmlərimizə elə siraət etmişdi ki, bir sıra filmlər sırf musiqili filmlərə çevrilmişdi. O çağlarda filmlərdə musiqi əsas yerlərdən birini tuturdu. Ən çox gəlir gətirən filmlərdən olan "Əhməd hardadır?" filminə rəğbəti yaradan əsas amillərdən biri onun içərisindəki musiqi idi", - deyə akademik Rafael Hüseynov qeyd edib.

Diqqətə çatdırılıb ki, həmin dövrdə kinoteatrlar sənət meydanı idi və o balaca səhnələrdə insanlar özlərini tamaşaçılara təqdim edirdilər. Tofiq Əhmədov o illərin ən populyar kinoteatr səhnələrindan olan "Azərbaycan" kinoteatrının caz orkestrində ifa edirdi, Mirzə Babayev, Tofiq Quliyevin həyat yoldaşı Dilarə Bağırbəyova kimi tanınmış sənət adamları oxuyurdular.

1960-cı ildə Azərbaycan Dövlət Teleradiosunda caz estrada orkestrının yaranmasından sonra Azərbaycan milli cazının həyatında yeni mərhələnin başladığını deyən akademik Rafael Hüseynov Xalq artisti Tofiq Əhmədovun rəhbərlik etdiyi orkestrın musiqiçilər üçün yeni pəncərə kimi açıldığını bildirib.

Verilişdə Xalq artisti, bəstəkar Faiq Sücəddinov Tofiq Əhmədovla ilk tanışlığından danışıb, onunla bağlı xatirələrini bölüşüb.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.