Türkiyə Dəyanət Vəqfinin (TDV) müdiri İzani Turan Türkiyənin Azərbaycandakı Səfirliyinin Din Xidmətləri müşaviri İhsan Açık  nümayəndə heyəti ilə birlikdə Nizami Gəncəvi adına Milli Azərbaycan Ədəbiyyatı Muzeyinin qonağı olublar. Vaxtaşırı Nizami Muzeyinə  üz tutan və “Bir millət, iki dövlət” şüarını uğurla yaşadan Türkiyənin Azərbaycandakı Səfirliyinin qonaqları bu sənət məbədini ziyarət etmədən ölkəmizdən ayrılmırlar.

Ziyarətçilər muzeyin ekspozisiyasında ən qədim dövrdən müasir dövrə kimi işıqlandırılan Azərbaycan ədəbiyyatı, tarixi və mədəniyyəti ilə  Ekspoziya şöbəsinin elmi işçisi İnarə Səfiyevanın müşaiyəti ilə tanış olublar.

Daha sonra muzeydə sərgilənən incəsənətin müxtəlif  növlərində işlənmiş sənətkarlıq nümunələri, nadir çap kitabları, nəfis miniatürlər və digər eksponatlar qonaqların marağına səbəb olub.

Sonda “Qədim mədəniyyətimizin ortaq dəyərlərini görmək”dən məmnunluq hissi yaşayan TDV-nin müdiri İzani Turan  muzeyin rəylər və təəssüratlar kitabında düşüncələrini bölüşüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.