Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram görkəmli kamança ustası, Xalq artisti Munis Şərifova həsr edilib.

Akademik Rafael Hüseynov ilk uşaqlıq illərindən kamançaya bağlanan Munis Şərifovun bu musiqi aləti ilə bir ömürdür birgə yol getdiyini bildirib. Qeyd edib ki, o, kamançamızın ən etibarlı yol yoldaşlarındandır. Munis Şərifov kamançaya Azərbaycandan kənarda da şöhrət gətirib. O, 1985-ci ildə Moskvada Tələbə və Gənclərin XII Ümumdünya Festivalında iştirak edərək diploma layiq görülüb.

Diqqətə çatdırılıb ki, 1993-cü ildə Tehranın Musiqi və Mədəniyyət Mərkəzinə dəvət alan Munis Şərifov orada 3 il kamança müəllimi kimi fəaliyyət göstərib. Həmçinin 2000-ci ildə Şotlandiyada beynəlxalq simpoziumda kamançamızın səsləniş gözəlliklərini məharətlə ifa edib. 2002-ci ildə Fransanın Paris və Strasburq şəhərlərində UNESKO-nun tədbirlərində konsert proqramı ilə Azərbaycan musiqi sənətini uğurla təmsil edib. 

Bildirilib ki, Xalq artisti Munis Şərifov musiqi mədəniyyətimizdə xidmətləri olan sənətkardır. O, uzun illərdir Qədim musiqi alətləri ansamblının bədii rəhbəri və konsertmeysteri olmaqla yanaşı, həm də Azərbaycanda yeganə çəqanə ifaçısıdır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.