Mədəniyyət kanalında “Vətənim” verilişinin milli teatrımızın ilk peşəkar aktyorlarından biri, Azərbaycan realist aktyor məktəbinin banisi Cahangir Zeynalova həsr olunan ilk buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişdə Azərbaycan teatrının yaranma tarixindən və teatrımızın beşiyi başında duranlardan olan Cahangir Zeynalovun yaradıcılığından bəhs olunub.

Bildirilib ki, Cahangir Zeynalov Həsən bəy Zərdabi, Nəcəf bəy Vəzirovun açdığı yolla irəliləyən fədailərdən daha öncə, 1865-ci ildə dünyaya gəlib və səhnə, teatr onun ən böyük məhəbbəti olub. Cahangir Zeynalov ürəyini, düşüncəsini, bütün varlığını, eləcə də içərisində yaşadığı mülkünü teatra qurban verib. Görkəmli sənətkar Azərbaycanda öz evində teatr açan ilk insanlardan biri kimi də tarixə düşüb.

"Cahangir Zeynalov çoxsaylı aktyorların səhnəyə gəlişinə yol açıb, onlara bələdçilik edib, səhnə adamlarına həm maddi, həm də mənəvi dəstək olub. Məhz bu xidmətinə görə Cahangir Zeynalov teatr və mədəniyyət tariximizdə öncül, aparıcı mövqe tutub. Cahangir Zeynalov ilk Azərbaycan aktyorudur ki, teatr ictimaiyyəti ona təntənəli yubiley ("Yomi ali") keçirib. Səhnə fəaliyyətinin 25 illiyi münasibətilə "Nicat" cəmiyyətinin Tağryev teatrında 30 noyabr 1910-cu ildə aktyorun təntənəli yubiley mərasimi təşkiil olunub, fasilələrdə xanəndə və sazəndələr çalıb-çağırıb, Mirzə Fətəli Axundzadənin "Lənkəran xanının vəziri" komediyası oynanılıb, Mirzə Həbib rolunu Cahangir Zeynalov ifa edib", - deyə akademik Rafael Hüseynov əlavə edib.

Cahangir Zeynalovun uzun səhnə ömrü boyunca çox surətlər yaratdığını deyən Rafael Hüseynov onun milli dramaturgiyamızda oynadığı Mirzə Fətəli Axundzadənin "Hacı Qara"sında Hacı Qara və Nəcəf bəy Vəzirovun "Hacı Qəmbər"ində Hacı Qəmbər rollarını xüsusi vurğulayıb. O, məşhur aktyorun rus teatrında da rollar aldığını söyləyib.

Diqqətə çatdırılıb ki, Cahangir Zeynalov oynadığı rolda doğruçuluğa, həyatiliyə, inandırıcılığa nail olmaq üçün obrazın daxili inkişaf məntiqinə əsaslanıb, müxtəlif üslubları sintez edə bilib. Cahangir Zeynalovun aktyor məktəbi köklü və davamlı prinsiplər əsasında qurulmaqla öz poetikasının müəyyən vacib göstərici-prinsiplərini formalaşdırıb. Görkəmli aktyor ömrü boyu öz varlığı ilə nümunə olmağı bacarıb.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.