Türkiyəli ədəbiyyatçı, şair, yazar və jurnalist Bəşir Ayvazoğlu (Beşir Ayvaz) Nizami Gəncəvi adına Milli Azərbaycan Ədəbiyyatı Muzeyinin qonağı olub.

“Türkiyə”, “Tərcüman”, “Hər gün” və Türkiyənin digər mətbuat səhifələrində imzası ilə tanınan Bəşir Ayvazoğlunun məqalələrinin türksoylu xalqlar arasında qarşılıqlı ədəbi əlaqələrin yaradılmasında xüsusi rolu olub. Onun fəaliyyəti çoxşaxəlidir. Bəşir Ayvazoğlu TRT-də ekspert, “Tərcüman” qəzetində redaktor, “Yeni Üfüq” qəzetində baş redaktor kimi fəaliyyət göstərib. Həmçinin CNN Türk-də “Bizim göy günbəzimiz”, TRT 2-də “Bir təpədən” adlı mədəniyyət proqramını hazırlayan yazar hazırda 1972-ci ildən işıq üzü görən “Türk ədəbiyyatı” dərgisinin baş redaktorudur.

Geniş ədəbi fəaliyyəti ilə yanaşı Bəşir Ayvazoğlu İstanbul 29 May Universitetində “İstanbul, cəmiyyət və ədəbiyyat” fənnindən də dərs deyir. Yazıçının oxucu kütləsi onu  “Ömrüm mənim bir atəşdir”, “İtirilmiş şeir”, “Neyin sirri” və digər kitablarından tanıyır.

Ədəbi mühitimizlə ədəbi-mədəni əlaqələr yaradan  Bəşir Ayvazoğlunun Nizami Muzeyinə ilk gəlişi idi. Bəşir Ayvazoğlu Azərbaycan ədəbiyyatının görkəmli yazıçılarının, şairlərinin həyat və yaradıcılığını əks etdirən bu sənət məbədinə  heyranlığını gizlədə bilməyib. Azərbaycan mətbuatının  bünövrəsini qoyan Həsən bəy Zərdabi, bu il 150 illik yubileyi qeyd olunacaq  “Əkinçi”  və digər “Həyat”, “Kəşkül” qəzetlərinə ayrılmış guşələr, “Molla Nəsrəddin”,  “Füyuzat” jurnallarının ekspozisiyada sərgilənməsi jurnalist kimi onu yaxından maraqlandırıb.

Muzeyin ekspozisiyası ilə Elmi fondlar şöbəsinin müdiri, filologiya üzrə fəlsəfə doktoru Nərmin Əliyevanın təqdimatında tanış olan yazıçı, xüsusən yaxından tanıdığı Cavad Heyət, Bəxtiyar Vahabzadə və eləcə də digər ədiblərimizə məxsus nümunələrlə tanış olub. Qeyd edib ki, zamanında Türkiyədə xalq şairi Bəxtiyar Vahabzadədən müsahibə almaq da ona nəsib olub. Azərbaycan ədəbiyyatının bütün seçkin insanlarını bir arada görməkdən məmnunluq hissi duyan, muzeyin rəylər və təəssüratlar kitabına ürək sözlərini yazan Bəşir Ayvazoğlu Azərbaycan xalqının və dövlətinin yazıçılarına, şairlərinə, sənətkarlarına göstərdiyi hörmət və ehtiram ifadə edən belə bir muzeyin dünyanın heç bir yerində olmadığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.