Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram görkəmli xanəndə, Xalq artisti, professor Canəli Əkbərova həsr olunub.

Bildirilib ki, sədaqətli və etibarlı adam olan Canəli Əkbərov həyatının mənası hesab etdiyi muğama ömrünün sonunadək sadiq olub. Xanəndə atasından və ustadlarından muğamın saflığını qorumaq dərslərini almış görkəmli xanənd bu öyüdlərə daim dəqiqliklə əməl edib, həmin ibrətləri yeniyetmələrə də aşılayıb.

"Onillər keçəcək, yüzillər dəyişəcək, müasirimiz olduğumuz Canəli Əkbərovun oxuduqları yeni nəsillərin yaşayacağı sabahlara da çatacaq və onlar bu yadigarlara örnək kimi baxaraq, bu ülgülərdən öyrənəcəklər", - deyə bildirən akademik Rafael Hüseynov professor Canəli Əkbərovun muğamın təmizliyini, duruluğunu daim qoruyub saxladığını vurğulayıb. Qeyd edib ki, el adamı olan Canəli Əkbərov daim xalq içərisində idi. O, insani münasibətlərində də eyni meyarlara riayət edirdi.

Akademik Rafael Hüseynov vurğulayıb ki, geniş səs diapazonuna malik sənətkar Canəli Əkbərov milli xanəndəlik məktəbinin nailiyyətlərini layiqincə davam etdirib və Azərbaycanın musiqi mədəniyyəti xəzinəsinə töhfələr verib. Sələflərinin yaradıcılıq ənənələrinə sadiqlik və muğamın klassik ifa tərzinin qorunub saxlanması onun altmış ildən artıq müddət ərzindəki fəaliyyətinin başlıca qayəsini təşkil edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.