Şimali Kipr Yaxın Şərq Universitetinin təşkilatçılığı ilə 27-28 mart 2025-ci ildə türk dünyasının tanınmış söz ustadı Məhəmmədhüseyn Şəhriyarın yaradıcılığına həsr olunmuş Beynəlxalq elmi konfrans baş tutub. Konfrans Şimali Kipr Yaxın Şərq Universitetində distant formatda təşkil edilib.

Konfransı giriş sözü ilə Şimali Kipr Yaxın Şərq Universitetinin Avrasiya Araşdırmaları Mərkəzinin müdiri, professor Qadir Golkarian açaraq iştirakçıları salamlayıb.

Nizami Gəncəvi adına Milli Azərbaycan Ədəbiyyatı Muzeyinin əməkdaşları da konfransın Şimali Kipr Yaxın Şərq Universitetinin Fən-Ədəbiyyat Fakültəsinin  Türk dili və Ədəbiyyatı bölümünün müdiri professor Esra Karabacakın moderatorluğu ilə keçirilən panel iclasında məruzə ediblər.

Muzeyin böyük elmi işçisi, filologiya üzrə fəlsəfə doktoru Gülnar Əqiq “Şəhriyar və Nizami ədəbi məktəbi”  mövzusunda çıxış edərək böyük Azərbaycan şairi Nizami Gəncəvinin ölməz irsinin yalnız klassik dövr şairlərinin deyil, müasir söz ustadlarının da ilham mənbəyi olduğunu bildirib. Məruzəçi müqayisəli təhlillər əsasında ustad Şəhriyarın yaradıcılığının klassik Şərq poeziyasından, o cümlədən Nizaminin bədii irsindən təsirləndiyini qeyd edib.  

Muzeyin şöbə müdiri, filologiya üzrə fəlsəfə doktoru Nərmin Əliyeva  simpoziumun bölmə iclasında  “Şəhriyarın müsahibələrində şeir düşüncələri” adlı məruzə ilə çıxış edib. O, Şəhriyarın müxtəlif şəxslərə  verdiyi müsahibələrində şeirin yaranması, üslubu və mahiyyəti, müasir ədəbiyyatda ənənə və novatorluq və digər məsələlərə dair fikirlərinin əks olunduğunu bildirib, bu müsahibələrin şairin poetik düşüncə aləminin öyrənilməsi baxımından əhəmiyyət daşıdığını vurğulayıb.

İki gün ərzində davam edən beynəlxalq elmi konfrans Şimali Kipr Türk Cümhuriyyəti, Azərbaycan, Türkiyə, Özbəkistan, İran, İraq, Hindistan və digər ölkələrdən olan iştirakçıların Məhəmmədhüseyn Şəhriyarın yaradıcılığının müxtəlif istiqamətlərdə tədqiqinə həsr olunmuş maraqlı çıxış və müzakirələri ilə davam edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.