Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan verliş Azərbaycanın məşhur opera müğənnisi Fatma Muxtarovaya həs olunub.

Qeyd olunub ki, Azərbaycanın məşhur opera müğənnisi Fatma Muxtarova parlaq şəxsiyyətinə, misilsiz istedadına və qeyri-adi xarici gözəlliyinə görə bu gün də sevilir. O, Azərbaycan mədəniyyəti tarixindəki əvəzsiz xidmətləri olan sənətkarlardandır. 

Proqramda akademik Rafael Hüseynov Azərbaycan SSR Xalq artisti və Gürcüstan SSR Əməkdar artisti Fatma Muxtarovanın zəngin ömür yoluna nəzər salıb. Bildirib ki, Fatma Muxtarova 26 mart 1893-cü ildə Cənubi Azərbaycanın Urmiya şəhərində doğulub. Kiçik yaşlarından ailəsi ilə birlikdə Rusiyaya (əvvəllər Rostova, sonra isə Peterburqa) köçüb. Atası Abbas Rzayev o, 3 yaşında olarkən vəfat etdiyindən anası Sara xanım ikinci dəfə Səttar Muxtarov adlı bir nəfərlə ailə həyatı qurub.1910-cu ildə yeni ailə Saratovda məskunlaşıb. Artıq 12 yaşında Fatma Muxtarova şarmanka ilə küçələrdə mahnılar oxuyub, pul qazanıb.

Diqqətə çatdırılıb ki, opera müğənnisi Fatma Muxtarovanın yaradıcılığının zirvəsi Karmen ("Karmen", J. Bize) partiyasıdır. Onun opera səhnəsində ilk çıxışı isə baş rolda Şalyapinin çıxış etdiyi V. Serovun "Yudif" operasında ona Oloferni partiyası olub.

Akademik Rafael Hüseynov şair Adil Babayevin Fatma Muxtarovaya həsr etdiyi "Qaraçı qızı" şeirindən misralar səsləndirib, Xalq artisti Fatma Muxtarovanın yerinin sənət tariximizdə həmişə ulduz kimi parlayacağını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.