Qırğızıstan-Türkiyə Manas Universitetinin təşkilatçılığı ilə 17-19 aprel 2025-ci il tarixlərində Türk Sivilizasiyasının ortaq dəyərlərinə həsr olunmuş Beynəlxalq elmi konfrans keçirilib. Konfrans Bişkekdə ‒ Qırğızıstan-Türkiyə Manas Universitetində üz-üzə və distant formada baş tutub.

Konfransın açılış mərasimində “Türk Uygarlığı Araştırma ve Uygulama Merkezi”nin prezidenti Prof.Dr. Mehmet Arif Özerbaş, Qırğızıstan-Türkiyə Manas Universitetinin rektor vəkili Prof.Dr. Almaz İbrayev, Azərbaycan Milli Elmlər Akademiyasının Prezidenti akademik İsa Həbibbəyli, Hoca Ahmet Yesevi Universitetinin rektor vəkili Prof.Dr. Naci Genç, Nermettin Erbakan Universitetinin rektoru Prof.Dr. Cem Zorlu, Qırğızıstan-Türkiyə Manas Universitetinin rektoru Prof.Dr. Alpaslan Ceylan çıxış edərək, iştirakçıları salamlayıb, konfransın Türk dünyasındakı əhəmiyyətindən bəhs ediblər.

Nizami Gəncəvi adına Milli Azərbaycan Ədəbiyyatı Muzeyinin “Doktorantura və elmi inkişaf” şöbəsinin elmi işçisi Rəhilə Sadıqova Anadolu Universitetinin dosenti Dr. Ümit Sormazın moderatorluğu ilə keçirilən panel iclasında məruzə edib. Muzeyin əməkdaşı “Binbir çeyrek saat. Tatar masalları” ‒ “Binbir gece” Geleneğinin türk edebiyatına yansıması” mövzusundakı məruzəsində “Min bir gecə” abidəsinin türk ədəbiyyatına təsiri və “Min bir çərək saat. Tatar nağılları”nın ümumtürk ədəbiyyatındakı yerindən söz açıb. Məruzəçi öz çıxışında “Min bir çərək saat. Tatar nağılları”nın məzmunu barədə qısa məlumat vermiş, əsərin yaranma səbəbi, struktur xüsusiyyətləri, “Min bir gecə” ilə oxşar və fərqli cəhətlərinə toxunmuşdur. Rəhilə Sadıqova sözügedən əsərdə türk təfəkkürünün izlərinə diqqət çəkərək, buradakı əsas obrazları “Kitabi-Dədə Qorqud” dastanı kontekstində təhlil etdiyini və qənaətbəxş nəticələrə gəldiyini bildirib. 

Üç gün ərzində davam edən beynəlxalq elmi konfransda Qırğızıstan Respublikası, Türkiyə, Azərbaycan, Qazaxıstan, Özbəkistan, Türkmənistan, Rusiya, İtaliya, Monqolustan və digər ölkələrdən olan iştirakçılar Türk sivilizasiyasının müxtəlif sahələrinə həsr olunmuş elmi məruzələrlə çıxış ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.