Hər il Nizami Gəncəvi adına Milli Azərbaycan Ədəbiyyatı Muzeyi istehsalat təcrübəsi məqsədilə tələbələri qəbul edir. Bu il isə Nizami Muzeyində Bakı Dövlət Universitetinin (BDU)  Şərqşünaslıq fakültəsinin Filologiya (Türk dili və ədəbiyyatı) və Regionşünaslıq (İran) ixtisasları üzrə bakalavr pilləsində təhsil alan IV kurs tələbələri təcrübə keçirlər. Muzey əməkdaşları tərəfindən müxtəlif mövzularda keçirilən elmi seminarlar tələbələrin təcrübələrinə müsbət təsir göstərir.

Tələbələrə növbəti seminar mövzusunu muzeyin Elmi fondlar şöbəsinin müdiri, filologiya üzrə fəlsəfə doktoru Nərmin Əliyeva təqdim edib. Nərmin Əliyeva “Türk dünyasının istiqlal şairəsi Ümmügülsüm Sadıqzadə” adlı məruzəsində  ilk qadın repressiya qurbanı, Rəsulzadələr nəslinə mənsub, sonralar taleyini Sadıqzadələr ailəsinə bağlayan  Ümmügülsüm Sadıqzadənin kədərli taleyindən və yaradıcılığından bəhs edib. Ü. Sadıqzadə Məhəmməd Əmin Rəsulzadənin əmisi qızı, yazıçı Seyid Hüseynin ömür-gün yoldaşı, xalq rəssamı Oqtay Sadıqzadənin anası olub.

Ümmügülsüm Sadıqzadənin yaradıcılığından bəhs edən məruzəçi şairənin  həm qəlb oxşayan incə ruhlu, həm də vətənpərvərlik mövzusunda yazılmış şeirlərini diqqətə çatdırıb. Onun milli istiqlalın yaranmasına həsr etdiyi “Türk ordusuna”,  “Ey türk oğlu”,  “Çəkil dəf ol”, “Əsgər anasına” şeirlərini sadalayıb və  Bayıl həbsxanasında olduğu dövrdə 37 yaşlı şairənin acılarını əks etdirən, ürək dağlayan “Qara xatirələrim” adlı xatiratından  söz açıb.

Sonda mövzu ilə bağlı düşüncələrindən bəhs edən tələbələr Azərbaycan xalqının unudulmaz tarixinin, repressiya dövrünün muzeyin ekspozisiyasında  nümayişindən, rəssam Oqtay Sadıqzadənin fırçası ilə çəkilmiş anası Ümmügülsüm Sadıqzadənin portretindən   təəssüratlarını bölüşüblər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.