Özbəkistan Respublikası Əlişir Nəvai adına Daşkənd Dövlət Özbək Dili və Ədəbiyyatı Universitetinin Dünya ədəbiyyatı və müqayisəli ədəbiyyatşünaslıq kafedrasının təşkilatçılığı ilə  22 aprel 2025-ci ildə “Şərq klassik poetikasının problemləri: Nəvai və Rumi” mövzusunda beynəlxalq elmi-nəzəri konfrans keçirilib.

Konfransın açılış mərasimində Əlişir Nəvai adına Daşkənd Dövlət Özbək Dili və Ədəbiyyatı Universitetinin rektoru, akademik Şuhrat Sirojiddinov, Türkiyə Respublikası Radio və Televiziya Ali Şurasının aparıcı mütəxəssisi, siyasi elmlər üzrə fəlsəfə doktoru Ahmet Akalın çıxş edib.

Nizami Gəncəvi adına Milli Azərbaycan Ədəbiyyatı Muzeyinin böyük elmi işçisi, filologiya üzrə fəlsəfə doktoru Gülnar Əqiq konfransa distant formada qoşularaq, konfransın “Nəvai və Rumi: bədiiyyat və tipologiya” bölməsində “Əlişir Nəvainin farsca rübailərində  Ruminin təsiri”  mövzusunda məruzə etmişdir. O, öz çıxışında, böyük özbək şairi Əmir Əlişir Nəvainin yaratdığı qiymətli əsərləri ilə həm yaşadığı dövrdə, həm də sonrakı zamanlarda insanların maariflənməsinə xidmət etdiyini, Nəvainin fars dilində yazdığı əsərlərində, xüsusilə rübailərində məşhur sufi mütəfəkkiri Mövlana Cəlaləddin Ruminin poetik üslubunun təsirinin oduğunu qeyd etmişdir.

Beynəlxalq konfrans müxtəlif ölkələrdən olan iştirkaçıların çıxışları və müzakirələrlə beş bölmə iclasında öz işini davam etdirmiş, sonda iştirakçılara sertifikatlar təqdim edilmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.