Şimali Kipr Türk Respublikasının Girnə şəhərinin Yaxın Doğu Universitetində “Türk mədəniyyəti, incəsənəti və mədəni irsin mühafizəsi” mövzusunda XIX  Beynəlxalq Simpozium keçirilib. Beynəlxalq simpozium Azərbaycanın görkəmli arxeoloq alimi, tarix elmləri doktoru, professor Qafar Cəbiyevin anadan olmasının 75 illiyinə həsr olunub. Tədbir Yaxın Doğu Universiteti (Girnə), Türkiyənin Adnan Menderes Universiteti (Aydın) və Azərbaycanın “Miras” Mədəni İrsin Öyrənilməsinə Kömək İctimai Birliyinin (Bakı) birgə təşkilatçılığı ilə  həm canlı, həm də onlayn formatda təşkil olunub.

Simpoziumun açılış mərasimində Şimali Kipr Türk Respublikasının Prezidenti Ersin Tatar iştirak edərək son illər Azərbaycan və Şimali Kipr  arasında ədəbi-mədəni əlaqələrin yüksək səviyyədə inkişaf etdiyini qeyd edib.

Simpoziumun 13 bölmə iclasında müxtəlif mövzularda məruzələr dinlənilib. Nizami Gəncəvi adına Milli Azərbaycan Ədəbiyyatı Muzeyinin böyük elmi işçisi, filologiya üzrə fəlsəfə doktoru Sevinc Heydərova simpoziumda onlayn formatda iştirak edərək auditoriyaya “COP29 və Nizami muzeyi” mövzusunda məruzəsini təqdim edib. Sevinc Heydərova qeyd edib ki, 2024-cü ilin noyabrında Azərbaycan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edib. COP29 günlərində  ölkəmizdə səfərdə olan rəsmi nümayəndələrin, qonaqların Nizami Muzeyinə ziyarətlərini xatırladan  məruzəçi, onların xalqımızın ədəbiyyatı, milli-mənəvi dəyərlərini əks etdirən ekspozisiyaya marağından və  tanışlığından söz açıb. Xüsusən COP29 çərçivəsində keçirilən tədbirlərin hələ də gündəmdə olduğunu və ölkələr arasında ədəbi-mədəni əlaqələrin, körpülərin yaranmasında əsas əhəmiyyətini vurğulayıb.

Simpoziumun Təşkilat Komitəsinin sədri dosent Dr. Əhməd Aytacın rəhbərliyi ilə keçirilən tədbirdə Türkiyə, Macarıstan, Albaniya, Şimali Makedoniya, Qazaxıstan, Özbəkistan, Moldova və digər ölkələri 80-dən çox alim və tədqiqatçı təmsil edib.Tədbirdə, həmçinin Azərbaycan diaspor təşkilatının, AMEA-nın əməkdaşları  və digər rəsmi nümayəndələr iştirak ediblər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.