Nizami Gəncəvi adına Milli Azərbaycan Ədəbiyyatı Muzeyində təcrübə keçən Bakı Dövlət Universitetinin (BDU)  Şərqşünaslıq fakültəsinin Filologiya (Türk dili və ədəbiyyatı) və Regionşünaslıq (İran) ixtisasları üzrə bakalavr pilləsində təhsil alan IV kurs tələbələri növbəti seminar mövzularını dinləyiblər.

Muzeyin Məktəblərlə və ictimaiyyətlə iş şöbəsinin elmi işçisi, filologiya üzrə fəlsəfə doktoru Nəcibə Bağırzadə “Milli istiqlal uğrunda mübarizədə Məhəmməd Əmin Rəsulzadənin rolu” mövzusunda çıxış edib. Məruzəçi Məhəmməd Əmin Rəsulzadənin həm siyasi, həm də parlaq publisistik fəaliyyətindən, ədəbi-tənqidi və elmi irsindən, Cümhuriyyətin qurulmasında, istiqlalın qazanılmasında müstəsna xidmətlərindən bəhs edib. O, qeyd edib ki, M.Ə. Rəsulzadənin Cümhuriyyətə qədərki, Cümhuriyyət dönəmində və mühacirət dövrü yaradıcılığı Azərbaycanın müstəqilliyi, milli təfəkkürün inkişafı, dilimizin qorunması ilə bağlı olub. Nəcibə Bağırzadə, həmçinin çıxışında bildirib ki, Cümhuriyyətin işğalı ilə barışmayan M.Ə. Rəsulzadə müstəqil Azərbaycan davasını mühacirətdə məqalələr yazmaqla, qəzet və jurnallar çap edərək ömrünün sonuna qədər davam etdirib.

Sonra tələbələrə növbəti seminar mövzusunu muzeyin Qədim və orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Aysel Məhərrəmova təqdim edib. Güney Azərbaycan demokratik ədəbiyyatının görkəmli nümayəndələrindən olan Mədinə Gülgünün lirik yaradıcılığından bəhs edən məruzəçi “Mədinə Gülgün lirik şeir sənətkarı kimi” mövzusunu diqqətə çatdırıb. Qeyd edib ki, Mədinə Gülgün yaradıcılığı, sənəti mövzu məhdudluğu tanımayıb. Şairənin ciddi siyasi mövzularla yanaşı, lirik janra sadiq qaldığını bildirən məruzəçi “Məhəbbət olmayanda”, “Təbrizi görməyincə”, “Quşlara daş atmayin”, “Araz nə bəxtəvərdir”, “Xəzəri görməyincə” və s. bu müqabildən olan şeirlərini sadalayıb və nümunələr səsləndirib.

Sonra A. Məhərrəmova qeyd edib ki,  Mədinə Gülgün yaradıcılığına bəstəkarlar da biganə qalmayıb. Onun şeirlərinə musiqilər bəstələnib. Şairənin “Durnalar qayıtdı” şeirini xatırladan məruzəçi bu şeirin daha çox dilimizdə  “Sən gəlməz oldun” bəstəsi ilə tanındığını və nəğmənin nəinki Azərbaycanda, eləcə də müxtəlif ölkələrdə sevildiyini söyləyib.

Sonda  tələbələrlə fikir mübadiləsi aparan məruzəçilər onların maraqlı mülahizələrini dinləyib və suallarını cavablandırıblar.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.