Türkiyənin Fatih Sultan Mehmet Vakıf Universitetində “Beynəlxalq Ərəb dili və Ədəbiyyatı araşdırmaları” mövzusunda III Beynəlxalq Konfrans təşkil olunub.

Konfransın açılış mərasimində Fatih Sultan Mehmet Vakıf Universitetinin rektoru professor Dr.Nevzat Şimşek, Konfransın Təşkilat Komitəsinin sədri professor Dr.Hüseyin Yazıçı, Qazi Universitetinin professoru Dr.Gürkan Dağbaşı, Harvard Universitetinin əməkdaşı Ahmed Habib çıxış edərək, qloballaşan dünyada ərəb dilinin tədrisi və təlimi məsələsinin vacibliyindən, bu sahədə aparılan genişmiqyaslı işlərin əhəmiyyətindən söz açıblar.

Konfransın gedişi zamanı 11 bölmə iclasında müxtəlif mövzulara toxunulmuş, ərəb dilinin istifadə arealına nəzər yetirilmiş, bu qədim və eyni zamanda aktual olan dilin elm, iqtisadiyyat və mədəniyyət sahələrindəki mühüm rolundan danışılmış, qeyd olunan istiqamətlərdə çoxsaylı məruzələr dinlənilmişdir. Nizami Gəncəvi adına Milli Azərbaycan Ədəbiyyatı Muzeyinin “Doktorantura və elmi inkişaf” şöbəsinin elmi işçisi Rəhilə Sadıqova konfransda distant formatda iştirak edərək, « دور اللغة العربية في الترويج للتراث الأدبي الأذربيجاني: مقاربة متعددة الثقافات« (“Azərbaycan ədəbi irsinin təbliğində ərəb dilinin rolu: Multikultural yanaşma”)  adlı məruzə ilə ərəb dilində çıxış edib.

Rəhilə Sadıqova bildirib ki, Vətənimizdə ilk dəfə olaraq, məhz Nizami muzeyində ərəb əsilli qonaqlar üçün öz dillərində ekskursiyalar təşkil olunub. Ərəb ədəbi dilində təqdim olunan izahatlar Azərbaycanın uzunəslik tarixi, zəngin ədəbiyyatı, əsrarəngiz mədəniyyəti barədə məlumatları əhatə edir və qonaqlar tərəfindən yüksək qiymətləndirilir. Məruzəçi vurğulayıb ki, bir xalqın mədəniyyətinin digər bir xalqın nümayəndələrinə ötürülməsi və təbliğ olunması prossesində ərəb ədəbi dili mühüm kommunikasiya vasitəsi kimi çıxış edir. Azərbaycan ədəbiyyatının əsas təmsilçilərindən olan Nizami Muzeyi ərəb ziyalılarının, alim və şairlərinin yüksək dəyər verdiyi bir elm ocağı kimi artıq ərəb dünyasında da şöhrət qazanmışdır. Bu məkanı ziyarət edən hər bir ərəb qonağının Azərbaycan ədəbiyyatını, mədəniyyətini sevməsi, onda Azərbaycan haqqında müsbət fikirlərin formalaşması təkcə muzeyin uğuru deyil, həm də Azərbaycanın ölkə hüdudlarından kənarda tanınması və sevilməsi deməkdir. Bu işdə ərəb ədəbi dilinin kommunikativ rolu danılmazdır.

Üç gün davam edən konfransda Türkiyə, Özbəkistan, Birləşmiş Ərəb Əmirlikləri, Küveyt, Oman, Malaziya, London, İndoneziya, Mərakeş, Əlcəzair, Səudiyyə Ərəbistanı, Azərbaycan, Rusiya, Fələstin, Misir, İordaniya, İraq ölkələrindən 160-a yaxın ərəbşünas alim və tədqiqatçı iştirak edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.