Nizami Gəncəvi adına Milli Azərbaycan Ədəbiyyatı Muzeyi əcnəbi qonaqların daha çox marağına səbəb olan və tez-tez üz tutduqları  məkanlardandır.  Hər gün müxtəlif ölkələrdən gələn qonaqlara qapısını açan muzeyi İsraildən gələn bir qrup turist ziyarət edib.

İsrail ziyalılarından ibarət turist qrupu muzeyin ekspozisiyası ilə  Beynəlxalq əlaqələr və dünya muzeyləri şöbəsinin elmi işçisi Natəvan Bağırovanın təqdimatında tanış olublar. Muzeyin əməkdaşı turistlərə Nizami muzeyinin qapılarını açdığı ilk günün 80 illiyindən söz açıb və tarixi haqqında məlumat verib.  

Azərbaycana ilk dəfə səfər etdiyini bildirən qonaqlar xalqımızın qonaqpərvərliyini, xüsusilə milli-mənəvi irsimizə göstərilən qayğını dəyərləndirib. İlk səfər zamanı maraqlı məlumatlar və Nizami muzeyinin ekspozisiyası ilə tanışlıq onlarda xoş təəssürat yaradıb. Muzeyin rəylər və təəssüratlar kitabına ürək sözlərini yazan israilli şair Samir Tafiş ədəbiyyatımızı əks etdirən Nizami muzeyi ilə tanışlıqdan məmnun olduğunu bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.