Nizami Gəncəvi adına Milli Azərbaycan Ədəbiyyatı Muzeyində təcrübə proqramında iştirak edən Bakı Dövlət Universitetinin (BDU)  Şərqşünaslıq fakültəsinin Filologiya (Türk dili və ədəbiyyatı) və Regionşünaslıq (İran) ixtisasları üzrə bakalavr pilləsində təhsil alan IV kurs tələbələrinə növbəti seminar mövzusu təqdim edilib. Hər həftə muzey mütəxəssisləri tərəfindən müxtəlif mövzularda keçirilən elmi seminarlar onların praktiki biliklərinin təkmilləşməsinə kömək olur.

Növbəti seminar mövzusu Nizami Gəncəvi adına Milli Azərbaycan Ədəbiyyatı Muzeyinin açılışının 80 illik yubileyinə həsr olunub. Muzeyin Doktorantura və elmi inkişaf şöbəsinin böyük elmi işçisi, filologiya üzrə fəlsəfə doktoru Sevinc Heydərova “Nizami muzeyində səksən illik ədəbiyyat yolu” mövzusunda məruzə ilə çıxış edib. Sevinc Heydərova muzeyin yaranma tarixindən bu günə qədər keçdiyi inkişaf yolundan, zəngin ekspoziyasından və fondundan söz açıb. Nizami muzeyinin yubileyi ərəfəsində nəşr olunan, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun müəllifi olduğu “Səksən ilin güzgüsü” əsərini xatırladan və kitaba istinad edən məruzəçi vurğulayıb ki, Nizami muzeyi Azərbaycan mədəniyyətinin yaddaş güzgüsüdür.

Sonra Nizami Gəncəvi irsinin yaşadılması istiqamətində və ümumilikdə Azərbaycan ədəbiyyatının, tarixinin və mədəniyyətinin təbliğində, təqdimində Nizami muzeyinin mühüm rolu  olduğunu qeyd edib. Muzeyin elmi nəşrlərinin –  “Risalə”, “Şərq”,  “Qaynaq”, “Xəzinə”, “Məclis” məcmuələrinin adlarını sadalayıb. Sevinc Heydərova ədəbi mühitdən bəhs edərək  muzeyin sovet dövründən bu günə qədər ədəbiyyatşünaslar, yazıçılar, tədqiqatçılar üçün əsas elmi və yaradıcı məkan olduğunu bildirib. Həmçinin Nizami muzeyinin nailiyyətlərinin, keçirilən tədbirlərin  geniş auditoriyaya çatdırılması və ictimai rəyə təsiri baxımından Kütləvi İnformasiya Vasitələrinin (KİV) rolunu vurğulayıb.

Sonda seminar çərçivəsində tələbələrlə qarşılıqlı fikir mübadiləsi aparılıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.