15-17 may 2025-ci il tarixlərində Türkiyənin Muş Alparslan Universitetində “V Beynəlxalq Türkoloji Araşdırmaları” mövzusunda beynəlxalq simpozium keçirilib.
Hibrid formada baş tutan simpoziumun açılış mərasimində Muş Alparslan Universitetinin rektoru prof. Mustafa Alican, Simpozium təşkilat komitəsinin sədri prof. Murat Öztürk, Van Yüzüncü Yıl Universitetinin rektoru prof. Hamdullah Şevli və Muş valisi Avni Çakır çıxış edərək tədbirin Türk dünyası üçün əhəmiyyətindən danışıblar.
Nizami Gəncəvi adına Milli Azərbaycan Ədəbiyyatı Muzeyinin əməkdaşları ‒ Doktorantura və elmi inkişaf şöbəsinin elmi işçisi Rəhilə Sadıqova və Qədim və Orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Aysel Məhərrəmova simpoziumun panel iclaslarında məruzə ilə çıxış ediblər. 
Van Yüzüncü Yıl Universiteti Təhsil fakültəsinin dosenti İrfan Polatın moderatorluğu ilə keçirilən panel iclasında Rəhilə Sadıqovanın “Binbir Çeyrek Saat. Tatar nağılları”: Türk hekayəçilik ənənəsi və kimliyinin yarıpoetik təmsili” adlı məruzəsi böyük maraqla dinlənilib. Məruzəçi ümumtürk ədəbiyyatının qiymətli nümunələrindən hesab edilən “Min bir çərək saat. Tatar nağılları”nın təhkiyə prinsiplərindən söz açıb, burada rast gəlinən qədim Azərbaycan şəhərlərinin adlarını xüsusilə diqqətə çatdırıb. O, həmçinin topluda ərəb mənşəli söz kimi göstərilən türk kəlmələrinə də toxunub, araşdırma zamanı əldə etdiyi maraqlı faktları dinləyicilərlə bölüşüb.

Rəhilə Sadıqova mövzu ilə bağlı panel moderatorunda və simpozium iştirakçılarında maraq doğuran məqamlara aydınlıq gətirib, ona ünvanlanan sualları cavablandırıb.
Van Yüzüncü Yıl Universiteti Ədəbiyyat fakültəsinin dosenti Uğur Bozkurtun moderatorluğu ilə keçirilən panel iclasında isə Aysel Məhərrəmova “Mirzə İbrahimov: XX əsrin 30-cu illərində milli birlik ideyası və "Gələcək gün” romanı” adlı məruzə ilə çıxış edib. Məruzəçi bildirib ki, XX əsrin 30-cu illərindən başlayaraq, ömrünün sonunadək Azərbaycanın mədəni və ideoloji-siyasi həyatında silinməz iz qoyan Mirzə İbrahimov ədəbi-publisistik, elmi-nəzəri yaradıcılığı, eləcə də ictimai-siyasi fəaliyyəti ilə Azərbaycan tarixində xüsusi yeri olan ədiblərdəndir. Yazıçının 1948-ci ildə qələmə aldığı “Gələcək gün” romanında Güney Azərbaycanda yaşayan soydaşlarımızın həyatı və orada baş vermiş milli-azadlıq hərəkatı haqqında bəhs olunur.

Aysel Məhərrəmova əlavə edib ki, Mirzə İbrahimov əsərin baş qəhrəmanı olan haqq-ədalət tərəfdarı Firidunun timsalında həmvətənlərinin yenilməzliyini, mübarizə əzmini əks etdirmişdir.

Məruzəçinin çıxışı böyük maraqla qarşılanıb və o, verilən sualları ətraflı cavablandırıb.

Üç gün davam edən beynəlxalq simpoziumda müxtəlif ölkələrdən olan iştirakçılar türkologiya sahəsində aparılan tədqiqatlara dair elmi məruzələrlə çıxış ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.