Türkiyənin Mersin vilayətində yerləşən Çağ Universitetində beynəlxalq “Türk dünyasında dil, edebiyat ve kültürel etkileşim sempozyumu” təşkil olunub.

Simpoziumun açılış mərasimində Çağ Universitetinin rektoru Prof.Dr. Murat Koç, Çağ Universiteti Ədəbiyyat fakültəsinin professoru Şirvan Kalsın və Bakı Dövlət Universiteti “Azərbaycan ədəbiyyatı tarixi” kafedrasının professoru Vaqif Sultanlı çıxış edərək, türk dilləri, ədəbiyyat və mədəniyyətlərinin tədqiqi məsələsində qarşıda duran vəzifənin aktuallığından söz açıblar.

Simpoziumun gedişi zamanı 6 bölmə iclasında ortaq Türk dünyasını maraqlandıran müxtəlif istiqamətli məruzələr dinlənilmiş, ortaq dil, əlifba, ədəbiyyat, dilçilik sahəsində aparılan siyasət və müqayisəli-tarixi aspektlərdə inkişaf etdirilən araşdırmalar, eləcə də ortaq mədəniyyət və klassik miras mövzularına toxunulmuşdur.

Nizami Gəncəvi adına Milli Azərbaycan Ədəbiyyatı Muzeyinin Filiallarla iş üzrə direktor müavini Ləman Muxtarova və muzeyin “Doktorantura və elmi inkişaf” şöbəsinin elmi işçisi Rəhilə Sadıqova simpoziumda distant formatda iştirak ediblər.

Professor Ahmet Buranın moderatorluğu ilə təşkil olunan panel iclasında Ləman Muxtarova “Azerbaycan Parlamentosunda Dil ve Alfabe konuları” mövzusunda məruzə ilə çıxış edib. Məruzəçi bildirib ki, Azərbaycan dili və əlifbası müxtəlif dövrlərdə təzyiqlərə məruz qaldığı üçün bu yoldakı daimi mübarizələr qaçılmaz olmuşdur. Dil və əlifba məsələlərinin rəsmi olaraq ilk müzakirəsi Azərbaycan Demokratik Cümhuriyyətinin Parlamentində aparılmış, məclis üzvü Abdulla bəy Əfəndizadənin Parlamentə təqdim olunan əlifba layihəsi qəbul olunmuşdur. Ləman Muxtarova əlavə edib ki, artıq müstəqillik dövründə dil və əlifba məsələləri ilə bağlı verilən qərarlar həm rəsmi şəkildə qəbul edilmiş, həm də ədəbiyyatda öz parlaq əksini tapmışdır.

Rəhilə Sadıqova isə dosent Belde Aka Kiyağanın moderatorluğu ilə keçirilən panel iclasında “Türk edebiyyatında anlatı ilkeleri: “Binbir çeyrek saat. Tatar masalları”na bilimsel bir bakış” adlı məruzəni dinləyicilərə təqdim edib. Məruzəçi “Min bir çərək saat. Tatar nağılları”nın timsalında Türk ədəbiyyatının səciyyəvi təhkiyə prinsiplərindən söz açıb. Rəhilə Sadıqova bildirib ki, “Min bir çərək saat” yalnız əyləncəli nağıllar toplusu deyil, həm də Türk təfəkkürünə xas dəyərlərin ötürülməsi, kollektiv yaddaşın qorunması baxımından əhəmiyyətli ədəbi nümunə olaraq qiymətləndirilir.

Türkologiya sahəsində araşdırma aparan tədqiqatçıların böyük marağına səbəb olan beynəlxalq simpoziumda müxtəlif ölkələrdən olan iştirakçılar dilçilik, ədəbiyyat və mədəniyyətə həsr olunmuş elmi məruzələrlə çıxış ediblər. 

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.