Bakı Bələdiyyə Teatrının təşkilatçılığı ilə Azərbaycan ədəbiyyatının görkəmli nümayəndəsi, Xalq şairi Rəsul Rzanın 115 illiyi münasibətilə dramaturqun “Vəfa” pyesi əsasında səhnələşdirilən eyniadlı tamaşasının premyerası oynanılıb.

 

Azərbaycan Dövlət Akademik Milli Dram Teatrında baş tutan premyeradan öncə millət vəkili, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov çıxış edərək Rəsul Rzanın yaradıcılıq yolundan, onun Azərbaycan ədəbiyyatına verdiyi dəyərli töhfələrdən danışıb. Bildirib ki, böyük şairimiz, unudulmaz Rəsul Rzanın 115 yaşı münasibətilə illər sonra yenidən təqdim olunan, Bakı Bələdiyyə Teatrının səhnələşdirdiyi “Vəfa” tamaşasının nümayişinin bu günə təsadüf etməsi heç də təsadüfi deyil. 28 May - Müstəqillik Günü ərəfəsində hazırlanan tamaşa Rəsul Rzanın ruhunu şad edir və bayram ovqatını daha da artırır.

 

Akademik Rafael Hüseynov Beynəlxalq Rəsul Rza Fondu tərəfindən təsis edilmiş və hər il görkəmli şairin doğum günü ərəfəsində təqdim edilən Rəsul Rza Mükafatına bu il layiq görülənlər sırasında tamaşanın quruluşçu rejissoru, Xalq artisti Mərahim Fərzəlibəyovun da olduğunu diqqətə çatdırıb.

 

Daha sonra o, Rəsul Rza Mükafatını Xalq artisti Mərahim Fərzəlibəyova təqdim edib.

 

Böyük maraqla izlənilən “Vəfa” tamaşası tamaşaçılar tərəfindən alqışlarla qarşılanıb.

 

Tamaşadan sonra Azərbaycan Yazıçılar Birliyin sədri, Xalq yazıçısı Anar və Azərbaycan Teatr Xadimləri İttifaqının sədri, Xalq artisti Hacı İsmayılov səhnə arxasına keçərək Bələdiyyə Teatrının kollektivi ilə görüşüblər. Yaradıcı heyətlə səmimi söhbət edən Xalq yazıçısı Anar və Hacı İsmayılov onları premyera münasibəti ilə təbrik edib, kollektivə yeni yaradıcılıq uğurları arzulayıblar.

 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.