Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram bu dəfə Azərbaycan ədəbiyyatının görkəmli söz sərraflarından biri, Xalq şairi Rəsul Rzanın 115 illiyinə həsr olunub.

Proqramda Xalq şairi Rəsul Rzanın mənalı həyat yolundan, ictimai fəaliyyətindən, parlaq ədəbi yaradıcılığından bəhs edilb. Bildirilib ki, Rəsul Rza söz sənətinə forma və məzmunca yeniliklər gətirmiş novator şair kimi böyük şöhrət qazanıb. O, böyük istedadı, zəngin və hərtərəfli bədii təfəkkürü ilə ölümsüz əsərlər yaratmış ustad sənətkardır. Şair yüksək bədii dəyəri, bəşəriliyi, milliliyi və rəngarəngliyi özündə ehtiva edən gözəl əsərləri ilə həyat həqiqətlərini incəliklərinə qədər əks etdirib, yaradıcılığı və çoxşaxəli fəaliyyəti ilə yaddaşlarda dərin iz qoyaraq xalqımıza misilsiz sənət inciləri bağışlayıb. 

Akademik Rafael Hüseynov zəngin yaradıcılığa və yüksək insani keyfiyyətlərə malik Rəsul Rzanın əziz xatirəsinin xalqımızın qəlbində daim yaşayacağını bildirib.

“Axşam görüşləri”ndə, həmçinin Xalq şairi Rəsul Rzanın öz səsi ilə səsləndirdiyi şeiri dinləyicilərə təqdim olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.