İyun ayının ilk həftəsində Nizami Gəncəvi adına Milli Azərbaycan Ədəbiyyatı Muzeyində filologiya üzrə fəlsəfə doktoru, muzeyin elmi katibi Nuranə Əsədullayevanın 50 illik yubileyi münasibətilə tədbir keçirilib.

 Tədbiri giriş sözü ilə açan Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov, Nuranə Əsədullayevanın elmi nailiyyətlərini və məsuliyyətli idarəçilik bacarığını diqqətə çatdırıb. Akademik Rafael Hüseynov yubilyara imzası ilə ənənəvi “Sözümüz” adlanan ildönümü ünvanını təqdim edib və yubilyarı təbrik edərək qeyd edib ki, Nuranə Əsədullayeva uzun illərdir muzeydə fəaliyyət göstərir. O, istər elmi, istər inzibati fəaliyyətində, istərsə də kollektivin üzvləri ilə münasibətdə hər zaman  səmimiyyəti, istiqanlılığı, işgüzarlığı ilə seçilib və muzeydə hamının hörmətini qazanıb. Akademik Rafael Hüseynov onun əmək fəaliyyətindən bəhs edərək bildirib ki, Nuranə Əsədullayevanın muzey yolu  Hüseyn Cavidin ev muzeyindən başlayıb. Hüseyn Cavidlə başlayan yol  onun “Hüseyn Cavidin “Azər” poeması” mövzusunda apardığı elmi tədqiqatla nəticələnib.

Sonra akademik Rafael Hüseynov onun elmdəki bütün uğurlarına Nizami muzeyində nail olduğunu və çox yaxın zamanlarda elmlər doktoru üzərində işlədiyi dissertasiyanı müdafiə edəcəyini vurğulayıb.

Daha sonra muzey əməkdaşlarından Komparativistika və bədii tərcümə şöbəsinin müdiri, filologiya elmləri doktoru, professor Şəfəq Əlibəyli, Mədəni irs və mənbəşünaslıq şöbəsinin müdiri, filologiya elmləri doktoru, professor Xatirə Bəşirli, Ekspozisiya şöbəsinin müdiri Tomiris Babanlı və Həmkarlar Təşkilatının sədri Ceyran Qənbərli yubilyarı təbrik ediblər. Çıxışlarda  qeyd edilib ki, Nuranə Əsədullayeva həm elmi araşdırmaları ilə filologiya sahəsində özünəməxsusluğu ilə seçilib, həm də zəhmətkeşliyi, humanistliyi ilə kollektiv tərəfindən daim sevilib.

Sonda Nuranə Əsədullayeva çıxış edərək, ona göstərilən diqqət və ehtirama görə təşəkkürünü bildirib. O, bu illər ərzində geriyə baxdığında əldə etdiyi uğurların əslində muzey rəhbərliyinin dəstəyi və kollektivin sevgisinin nəticəsi olduğunu bildirib.

Tədbirin sonunda yubilyara hədiyyələr təqdim edilib və xatirə şəkilləri çəkilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.