Nizami Gəncəvi adına Milli Azərbaycan Ədəbiyyatı Muzeyində Mülki Müdafiə (MM) tədbirlər planına əsasən “Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda rəhbər heyətin mülki müdafiə məşqi keçirilib.

Məşq Fövqəladə Hallar Nazirliyinin müəyyən etdiyi ilk hazırlıq planına uyğun olaraq təşkil olunub. Məşqin əsas məqsədi fövqəladə hallarda operativ idarəetmə bacarıqlarının təkmilləşdirlməsini, eləcə də rəhbər şəxslərin mülkü müdafiə sisteminin əsas prinsipləri üzrə biliklərinin artırılmasını hədəfləyib.

Tədbirdə Rəhbər heyət, MM qüvvələrinin komandir – rəis heyəti, Fövqəladə Hallar Komissiyasının üzvləri, Səbail rayonu üzrə Fövqəladə Hallar və Mülki Müdafiə şöbəsinin rəisi, polkovnik-leytenant Nazir Əkbərov və digər nümayəndələr  iştirak ediblər.

Tədbiri giriş sözü ilə muzeyin Mülki Müdafiə Qərargahının rəisi İsmayıl Muxtarov açaraq Rəhbər heyətin mülki müdafiə məşqinin keçirilməsinin məqsəd və əhəmiyyəti barədə iştirakçılara geniş məlumat verib.

Məşqdə xəbərdarlıq siqnallarının verilməsi və ilkin reaksiya tədbirləri, əməkdaşların təxliyə planına uyğun olaraq təhlükəsiz əraziyə köçürülməsi, fövqəladə vəziyyətin qiymətləndirilməsi və idarə olunması üzrə qərarların qəbulu, ərazidə ilkin tibbi yardım və yanğınsöndürmə tədbirlərinin təşkili, qərargah fəaliyyəti və əlaqələndirmə mexanizmlərinin işlək vəziyyətdə yoxlanılması izah edilib.

Daha sonra muzeyin yanğından mühafizə mühəndisi və eyni zamanda yanğınsöndürmə manqasının komandiri Pərviz Ələsgərov fövqəladə hallarda əhalinin təhlükəsizliyinin təmin olunması üçün vacib tədbirlər barədə çıxış edib.

Məşq çərçivəsində çıxış edən Səbail rayonu üzrə Fövqəladə Hallar və Mülki Müdafiə şöbəsinin rəisi, polkovnik-leytenant Nazir Əkbərov fövqəladə hallarda davranış qaydaları, təhlükəsizlik tədbirləri və ilkin tibbi yardımın təşkilindən bəhs edib və ətraflı məlumat verib. O, xüsusilə zəlzələ, yanğın və digər qəza hallarında insanların necə davranmalı olduqlarını, panikaya düşmədən təhlükəsizliyin təmin olunması yollarını sadə və anlaşılan formada izah edib.

Tədbirdə iştirakçılara fövqəladə hallarda davranış qaydaları ilə bağlı tövsiyələr verilib. Mövzu ətrafında suallar cavablandırılıb və yadda saxlanılmalı əsas məqamlar bir daha vurğulanaraq belə tədbirlərin kollektivin təhlükəsizlik mədəniyyətinin formalaşmasında mühüm rolu olduğu qeyd edilib. Bu məqsədlə gələcəkdə daha genişmiqyaslı təlimlərin keçirilməsi nəzərdə tutulub.

Sonda mövzu ilə bağlı videoçarx nümayiş etdirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.