Rəşid Behbudov adına Dövlət Mahnı Teatrında folklorşünas alim, Aşıq Ələsgər irsinin tədqiqatçısı İslam Ələsgərin anadan olmasının 100 illiyi münasibətilə yubiley gecəsi keçirilib.

“Dədə Ələsgər Ocağı” İctimai Birliyi tərəfindən keçirilən tədbirdə əvvəlcə İslam Ələsgərdən bəhs edən videoçarx nümayiş olunub.

Gecədə çıxış edən “Dədə Ələsgər Ocağı” İctimai Birliyinin sədri Xətai Ələsgərli tədbirin əhəmiyyətindən söhbət açıb. O qeyd edib ki, yubiley gecəsi

Azərbaycan ədəbiyyatının və xalq yaradıcılığının nadir simalarından olan Aşıq Ələsgər irsinin elmi şəkildə araşdırılıb qorunmasında müstəsna xidmətləri olan İslam Ələsgərin zəngin irsinə həsr olunub.

Professor Qəzənfər Paşayev diqqətə çatdırıb ki, Aşıq Ələsgər haqqında danışmaq, onu anlamaq, onu sözlərlə ifadə etmək elə də asan deyil. “Bu ad sanki bir zirvədir. O, təkcə bir aşıq deyil, bir məktəb, bir fəlsəfə, bir mənəviyyat dünyasıdır. Aşıq Ələsgər irsi xalqın yaddaşına hopub, onun ruhunun aynası olub. Bu irsin qorunması, yaşadılması və gələcək nəsillərə ötürülməsi milli borcdur”, - deyə o əlavə edib.

Deputat Rafael Hüseynov deyib ki, Aşıq Ələsgər deyəndə bu millət nəzərdə tutulur. “Ələsgər müstəvisində hamı bərabərdir. O, vətəndaş olmağın, millətə necə xidmət etməyin düsturunu qoyub gedib. El içində pak qalmaq, doğru yoldan dönməmək onun xarakterinin əsas xüsusiyyətlərindən biri idi”, - deyə o bildirib.

Filologiya elmləri doktoru, professor Muxtar İmanov, tibb üzrə fəlsəfə doktoru Hacı Abbas Bağırov, tədqiqatçı Hacı Loğman Babacanlı, “İrəvan” xalq çalğı alətləri ansamblının bədii rəhbəri Maya Qafarova, tibb elmləri doktoru İbadulla Ağayev, Aşıq Ələsgərin nəticəsi rəssam Nailə Ələsgərli, şair-publisist Ramiz Qusarçaylı İslam Ələsgərin Aşıq Ələsgər irsi ilə bağlı materialların toplanması, nəşri və elmi əsaslarla öyrənilməsindəki rolundan danışıblar.

Moskvada yaşayan professor Ələddin Allahverdiyevin səmimi və duyğulu məktubu yubiley gecəsində səsləndirilib.

Tədbirin bədii hissəsində Aşıq Ramin Qarayev, “İrəvan” xalq çalğı alətləri ansamblı, xanəndə Mehranə Vəliqızı, aşıq Dərya Mərdənzadə, vokalist Marianərmin Əjdərova, Aşıq Təbriz Vəliyev, aşıq Cəmaləddin Quliyev və gənc aşıq Hüseyn Laçınlı çıxış ediblər.

Sonda Aşıq Ələsgər irsinin tədqiqi və təbliği sahəsində xidmətləri olan Qəzənfər Paşayev, Rafael Hüseynov və Hacı Abbas Bağırov “Aşıq Ələsgər – 200” yubiley medalı ilə təltif olunub. “İrəvan” xalq çalğı alətləri ansamblının bədii rəhbəri, sənətşünaslıq üzrə fəlsəfə doktoru Maya Qafarova isə Fəxri diploma layiq görülüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.