Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram Azərbaycanın ilk peşəkar opera ifaçısı, Xalq artisti Fatma Muxtarovanın 120 illiyinə həsr olunub.

"Axşam görüşləri"ndə Azərbaycan musiqi tarixində silinməz iz qoymuş Fatma Muxtarovanın ömür yoluna nəzər salınıb, onun ölkə mədəniyyətindəki müstəsna yerindən bəhs olunub.

Akademik Rafael Hüseynov Fatma Muxtarovanı şəxsən görməsə də, onun qızı və nəvəsi ilə tanış olduğunu, veriliş hazırlayarkən onların görkəmli opera müğənnisi ilə bağlı münis xatirələrini dinlədiyini, foto və sənədlərin dili ilə Fatma Muxtarovanın həyatının enişli-yoxuşlu günlərinə şahid olduğunu bildirib. Qeyd edib ki, Fatma Muxtarova Cənubi Azərbaycanın Urmiya şəhərində doğulub. Kiçik yaşlarından ailəsi ilə birlikdə Rusiyaya, əvvəllər Rostova, sonra isə Peterburqa köçmüşdür. Atası Abbas Rzayev o, 3 yaşında olarkən vəfat etdiyindən anası Sara xanım ikinci dəfə iranlı Səttar Muxtarov adlı bir nəfərlə ailə həyatı qurub.  1910-cu ildə yeni ailə Saratovda məskunlaşıb. Artıq 8 yaşında Fatma Muxtarova şarmanka ilə küçələrdə mahnılar oxuyaraq pul qazanıb.

Akademik Rafael Hüseynov şair Adil Babayevin Fatma Muxtarovaya həsr etdiyi "Qaraçı qızı" şeirindən misralar səsləndirib, Xalq artisti Fatma Muxtarovanın yerinin sənət tariximizdə həmişə ulduz kimi parlayacağını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.