Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram görkəmli ədəbiyyatşünas, şərqşünas, milli əruzşünaslıq məktəbinin banisi, filologiya elmləri doktoru, professor Əkrəm Cəfərin (1905–1991) anadan olmasının 120 illiyinə həsr olunub.

“Axşam görüşləri”ndə görkəmli alimin Azərbaycan ədəbi dilinin tədqiqi sahəsinə verdiyi töhfələrdən, zəngin irsindən, çoxşaxəli elmi fəaliyyətindən ətraflı bəhs edilib.

Akademik Rafael Hüseynov bildirib ki, professor Əkrəm Cəfər uşaqlıq illərindən ömrünün son günlərinədək şeir və musiqi ilə nəfəs alıb. Böyük ustadlardan dərs alan alim özü də müstəsna müəllim olub. Biliklərini səxavətlə paylamaq ona müdrik müəllimlərindən qalmış ibrət və vəsiyyət olub.

"Azərbaycan ədəbiyyatı və mədəniyyətinin ən əski çağlardan yeni zamanlaradək olan xəzinəsi onun yaddaşında idi. Heyrətamiz hafizə sahibi olan Əkrəm Cəfər dayanmadan saatlarla şeirlər söyləyərdi və bu şeirlər indiyədək yaranmış söz sərvətinin ən gözəl inciləri idi", - deyən Rafael Hüseynov onun Nizami Gəncəvi, Cəlaləddin Rumi, Sədi, Hafiz, Nəsimi, Füzuli ilə nəfəs aldığını diqqətə çatdırıb. Qeyd edib ki, ölməzlərimizin yaratdığı söz inciləri onun iliyinə qədər hopduğundan Əkrəm Cəfər elə başqadan-başa şeir, musiqi dolu şəxsiyyət idi.

Bildirilib ki, böyük ustadı düşüncədə canlandırdıqda onun köhnə zamanlardakı nəhənglərlə həmzaman olduğunu görürük. O, əski əyyamların sabahlar içərisində də yaşamalı olan səsini bugünə gətirənlərdəndir. Əkrəm Cəfəri anmaq şeirin sehrinə dalmaq, muğamın əsrarəngiz aləminə qapılmaqdır. 

Əkrəm Cəfərin digər məziyyətlərindən başqa, həm də şair olduğunu söyləyən Rafael Hüseynov alimin çox sevdiyi və dərindən bildiyi poeziyanın onunçün təsəlli adası olduğunu vurğulayıb. Qeyd edib ki, yaratdığı köhnəlmiş irslə, dəyərli kitabları ilə professor Əkrəm Cəfər bütün gələcəklər içərisində yaşamaq haqqını qazanıb.

Proqramda akademik Rafael Hüseynov Əkrəm Cəfərin dahi Nizamiyə həsr etdiyi şeirini səsləndirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.