Mədəniyyət kanalında “Vətənim” verilişinin Xalq şairi Rəsul Rza və onun həyat yoldaşı, Xalq şairi Nigar Rəfibəyliyə həsr edilən üçüncü buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən veriliş Xalq şairləri Rəsul Rza və Nigar Rəfibəylinin yaşadıqları müqəddəs ocaqda - Buzovnadakı bağ evlərində çəkilib.

Verilişdə Azərbaycan Yazıçılar Birliyinin sədri, Xalq yazıçısı Anar və şərqşünas alim Fidan Rzayeva valideynləri ilə bağlı xatirələrini bölüşüblər. Həmçinin Xalq şairi Rəsul Rzanın öz səsindən şeirləri təqdim edilib.

Akademik Rafael Hüseynov Rəsul Rza ilə Nigar Rəfibəylinin həyatda və ədəbiyyatdakı ləyaqətli davamı Anarla Buzovnaya bağa getdiyini xatırlayıb. Çoxdan kimsənin getmədiyi bağda köhnə uzaq illərin təzə qəzet-jurnallarının, haçandan bəri qatı açılmamış kitablaınr, Rəsula, Nigara müxtəlif şəhərlərdən gəlmiş məktubların şahidi olduğunu söyləyib. Bildirib ki, Rəsul Rza həyatı boyu ədəbiyyatca musiqiyə, rəssamlığa bağlı olub. Həm bu istiqamətlərin hər birini bütövlükdə, həm də seçkin yaradıcılarını ayrılıqda könüldən sevərək izləyib. O, həm rəssamlıqda, həm musiqidə bəlli olanların təkrarından yaranan təkrarsızlıqlara daim heyrətlənib, eyni işi özü də şeirdə görərək başqalarını təəccübləndirməyi bacarıb.

Rəsul Rzanın ədəbiyyatımızın tarixində və Azərbaycan insanının yaddaşında klassik kimi heykəlləşdiyini deyən akademik Rafael Hüseynov 1987-ci ildə ədibin “Rənglər” silsiləsini ayrıca bir toplu şəklində çapa hazırladığını, müqəddimə yazdığını bildirib. 

Qeyd olunub ki, böyük şairin “Rənglər silsiləsi” ədəbiyyatın xoş bir saatında heyrətdən doğularaq həmişə heyrətlər oyatmaqda davam edəcək bir söz incisi kimi vücuda gəldi. İnqilabçılıq, barışmazlıq, sığmazlıq Rəsul Rza kimi zatında, cövhərində olan insanların mübarizəsi heç vaxt dayanmır. Şeiri qalırsa, sözü yaşayırsa, şeirinin və sözünün içərisində rənglərin min bir çaları diridirsə, demək, Rəsul Rza da həm bu gün, həm gələcəklərdə də – yağışlar yağdıqca, yarpaqlar töküldükcə, çiçəklər açdıqca, insan sevdikcə və nifrət bəslədikcə mübarizələrini hökmən davam etdirəcək. 

"Xalq şairi Rəsul Rza əruzda da şeir yazıb, heca vəznində də. Ancaq ədəbiyyata gəlişinin erkən çağlarından başlayaraq yaradıcılığının əsas hissəsini sərbəst şeirə həsr edib. Bununla da yalnız Azərbaycan söz sənətində deyil, bütövlükdə türkdilli poeziyada sərbəst şeirin ən böyük yaradıcılarından biri kimi qalıb. Şairin şeirimizin baş sərbəstçisi olaraq bir böyüklüyü də bundan ibarət oldu ki, bu növ şeirin daxildən sərbəstliyini, azadlığını, fikircə uçuş asudəliyini içəridən artırdı", - deyə Rafael Hüseynov əlavə edib.

Diqqətə çatdırılıb ki, Rəsul Rza həm yaradıcılığı, həm şəxsiyyəti ilə məktəb olan insan idi. Payına düşmüş vaxtla XX əsrin adamı idi, amma irəlidən XXI yüzil gəlir, üçüncü minillik gülümsəyirdi. Tale ona da millətin işıq daşıyıcısı böyük övladlarından biri kimi həmin yeni zamanı gətirənlərdən biri olmaq vəzifəsini həvalə etmişdi. Rəsul Rza yaşından tez böyüyən, həyatın sınaqları ilə erkən yaşlarından qarşılaşan və zəmanə labirintlərindən ən düzgün yolları özü tapmağa gəncliyindən alışmış bir vətənpərvər idi. O, xalqın içindən çıxıb gəlmiş, torpaq qoxusunu həyatı uzunu unutmayan bir millət sevdalısı, həm də yeni dövrün övladı idi. 

Akademik Rafael Hüseynov vurğulayıb ki, Rəsul Rzanın sözlərinə Azərbaycanın çoxlu və çox istedadlı bəstəkarları onun sağlığında da sıra-sıra nəğmələr yazıblar. Onun sözlərinə ilk nəğməni bəstələyən Asəf Zeynallı olub. Şairin sözlərinə Niyazi də mahnılar yazıb, Tofiq Quliyev də mahnılar bəstələyib. Ölməzlərin ölməzi nəğmələr arasında isə ən zirvədə qərar tutan “Qızıl üzük”dür.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.