İyulun 2-də Nizami Gəncəvi adına Milli Azərbaycan Ədəbiyyatı Muzeyində bu qurumun Xaqani Şirvani adına Aran Regional filialının müdiri filologiya üzrə fəlsəfə doktoru Yaqut Əşrəfovanın 65 illik yubileyinə həsr edilmiş ədəbi-bədii tədbir keçirilib.

Tədbirdə elm, ədəbiyyat və mədəniyyət xadimləri, ictimaiyyət nümayəndələri, Nizami Muzeyinin əməkdaşları, yubilyarın yaxınları və qohumları, media mənsubları və digər qonaqlar iştirak ediblər.

Mərasimi girş nitqi ilə muzeyin direktoru akademik Rafael Hüseynov açaraq yubilyarın mənalı ömür yolundan danışıb, Yaqut Əşrəfovanın uzun illər zəngin elmi-ədəbi fəaliyyəti ilə respublikada elmin və mədəniyyətin inkişafına verdiyi töhfələrdən bəhs edib. Bildirib ki, muzeyin Xaqani Şirvani adına Aran Regional filialı yarandığı gündən ora rəhbərlik edən Yaqut Əşrəfova Aran bölgəsinin ictimai-siyasi və mədəni həyatında fəal iştirak edərək vətəncanlılığı və fədakarlığı ilə seçilib. Alimin rəhbərliyi ilə muzeyin fondu daha da zənginləşib, ziyarətçilərin sayı artıb, bu mədəniyyət ocağı rayonun ədəbi-mədəni həyatında aparıcı mövqe tutub.

Akademik Rafael Hüseynov yubilyarın peşəkar aparıcılıq qabiliyyətindən də bəhs edərək, onun Azərbaycanın tanınmış mədəniyyət, ədəbiyyat, incəsənət xadimləri ilə mütəmadi olaraq görüşlər təşkil etdiyini vurğulayıb. Direktor Vətən müharibəsi şəhidlərinin həyat və döyüş yolunun Yaqut Əşrəfovanın yaradıcılığının əsas istiqamətlərindən biri olduğunu diqqətə çatdırıb.

Akademik Rafael Hüseynov alimin gənc mütəxəssislərin yetişməsində, onların elmə, ədəbiyyata marağının artırılmasında da böyük xidmətləri olduğunu bildirib. O, yubilyarın yüksək insani keyfiyyətlərindən danışaraq, Yaqut Əşrəfovanın həyat və fəaliyyətinin gənc nəsillər üçün örnək olduğunu söyləyib.

Daha sonra akademik Rafael Hüseynov "Sözümüz" adlı təbrik ünvanını yubilyara təqdim edib, ona bundan sonrakı fəaliyyətində uğurlar arzulayıb.

Tədbirdə, həmçinin Aşıq Ağamurad Şirvanlı muzeyin Xaqani Şirvani adına Aran Regional filialının tədbirlərində fəal iştirakı və 60 illik yubileyi münasibətilə Fəxri fərmanla təltif edilib.

Mərasimdə Xalq artisti Eldost Bayram, muzeyin Komparativistika və bədii tərcümə şöbəsinin müdiri professor Şəfəq Əlibəyli, Mədəni irs və mənbəşünaslıq şöbəsinin müdiri professor Xatirə Bəşirli, “Söz” jurnalının baş redaktoru Sevda Əlibəyli, Folklor İnstitutunun direktoru filologiya elmləri doktoru Hikmət Quliyev, şair Qəşəm İsabəyli, Bakı Slavyan Universitetinin İctimai elmlər kafedrasının professor Habil Məmmədov, Aşıq Şakirin nəvəsi professor Qətibə Mahmudova, Azərbaycan Yazıçılar Birliyinin üzvü Zakirə Allahverdiyeva, yubilyarın qızı Nərmin Dadaşova, Vətən müharibəsi şəhidi Ziyadxan Əliyevin anası Müşgünaz Əliyeva və şəhid Cəmil Həşimlinin valideyni Simuzər Bağıyeva çıxış edərək yubilyara xoş arzularını bildiriblər. Çıxış edənlər Yaqut Əşrəfovanın çoxşaxəli yaradıcılığından söhbət açıb, onu gözəl insan, vətənpərvər alim kimi xarakterizə ediblər.

Çıxışlarda Yaqut Əşrəfovanın hələ bundan sonra da coşğunluqla aparıcılıq edəcəyinə, ədəbiyyatşünaslıq elmimizə yeni töhfələr verəcəyinə əminlik ifadə edilib.

Tədbirin bədii hissəsi Əməkdar artist Elnarə Abdullayeva, Əməkdar mədəniyyət işçisi Aşıq Ağamurad Şirvanlı, Özbəkistanda keçirilən IV Beynəlxalq Baxşı Festivalının “Qran-Pri” mükafatçısı Aşıq Qəlbinur İbrahimli və Aşıq Əli Tapdıqoğlunun ifası ilə davam edib.

Sonda çıxış edən yubilyar böyük diqqət və qayğıya görə minnətdarlığını bildirib, tədbirin təşkilatçılarına və iştirakçılarına təşəkkür edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.