Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram görkəmli xanəndə Sahib Şükürovun yaradıcılığına həsr olunub.

Akademik Rafael Hüseynov bildirib ki, Ağdamda böyüyən Sahib Şükürovun ilk muğam-sənət məktəbi Qarabağın toy-düyünü olmuşdur. O, el şənliklərində əfsanəvi Cabbarı yaxın məsafədən dinləyə bilmişdir. Sahib Şükürovun bir müğınni, xanəndə kimi parlayışı Təbrikdə baş vermişdi.

O, 1946-cı ildə Təbriz Flarmoniyası yaradılanda ora cəlb edilən istedadlı gənclərdən birinin Sahib Şükürov olduğunu söyləyib. Akademik Rafael Hüseynov yenicə yaranmış Təbriz Flarmoniyasının direktoru şair Əli Tudənin 1980-ci illərin əvvəllərində keçmişə qayıdaraq Sahib Şükürovun gənc, təravətli, ruh oxşayan avazını xatırladığını bildirib. Qeyd edib ki, şair Əli Tudə gənc xanəndənin Flarmoniyada toy məclisində baş verənləri qeydə alaraq yazıb: "Flarmoniyada istedadlı, təcrübəli və nüfuzlu sənətkarlardan ibarət böyük bir müğənnilər dəstəsi var idi. Solistlərdən Ələsgər Rizvan, Sahib Ruhi Şükürov, Səyid Zaman, Hidayət Məhəmmədzadə, Kəklik xanım, Fatma xanım və başqaları öz əlvan ifaları ilə tamaşaçıların gözlərinə işıq, ürəklərinə hərarət, xəyallarına qanad verirdi. Müdriyyət Flarmoniyanın yarandığı ilk günlərdən başlayaraq artistlərin istedadını və nüfuzunu qətiyyətlə qorumağı qərara aldı. Sənətkarların müxtəlif ehtiyaclarının ödənilməsi məsələsini tabe olduğu idarənin qarşısında ciddiyyətlə qoydu. Flarmoniyada fəaliyyət göstərən sənətkarlar toylara, məclislərə təkrar-təkrar dəvət olunsalar da getmirdilər. Lakin kimsə özünə ailə qurmaq istədikdə müdriyyətə müraciət edirdi və o zaman bütün kollektiv həmin toy məclisində iştirak edirdi. Toy məclisi də unudulmaz konsertə çevrilirdi. Belə toylardan biri gənc istedadlı solist Sahib Şükürova nəsib oldu. Təbrizin aylı gecələrindən birində, xeyir-dua dolu sağlıqların müşayiəti ilə başlanan toy dilsiz divarların arasına sığmayıb, gül ətirli geniş həyətə qədər uzandı. Həmin musiqi məclisində ürəklərə yatan nəğmələr, sümüklərə düşən havalar, əlləri isidən alqışlar günəş üfüqdən qalxanadək davam etdi. Bu toy işgüzar kollektivin ürəklərində əziz, unudulmaz xatirəyə çevrildi".

Sahib Şükürovun uzun müddət müəllimlik etdiyini söyləyən akademik Rafael Hüseynov onun 1963-1975-ci illərdə Asəf Zeynallı adına orta ixtisas musiqi məktəbində dərs dediyini, daha sonra isə Mədəniyyət və İncəsənət Universitetində pedaqoji fəaliyyətini davam etdirdiyini bildirib. O, ömrünün 60 ilini musiqiyə həsr etmiş görkəmli xanəndənin Azərbaycan mədəniyyəti tarixində xüsusi yeri olduğunu vurğulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.